ഞാൻ പ്രീതി നടേശൻ വെള്ളാപ്പള്ളി നടേശന്റെ സഹയാത്രിക

വെള്ളാപ്പള്ളി നടേശൻ എവിടെപ്പോയാലും ഒരു നിഴൽ പോലെ അദ്ദേഹത്തെ അനുഗമിക്കുന്ന പ്രീതിനടേശൻ, പരിചയപ്പെടുന്ന എല്ലാവർക്കും ചേച്ചിയാണ്.

- പി. ജയചന്ദ്രൻ

കേരളത്തിലെ ഏറ്റവും വലിയ സമുദായ സംഘടനയുടെ ഏറ്റവും വലിയ നേതാവാണ് വെള്ളാപ്പള്ളി നടേശൻ. അദ്ദേഹത്തിന്റെ ഭാര്യ പ്രീതി നടേശന് എടുത്തുപറയാവുന്ന ഒരു പ്രത്യേകതയുണ്ട്. കേരളത്തിൽ ഏറ്റവും കൂടുതലാളുകൾ “ചേച്ചീ' എന്നുവിളിച്ച് അഭിസംബോധന ചെയ്യുന്ന മറ്റൊരു സ്ത്രീ വേറെ കാണില്ല. വെള്ളാപ്പള്ളി നടേശൻ എവിടെപ്പോയാലും ഒരു നിഴൽ പോലെ അദ്ദേഹത്തെ അനുഗമിക്കുന്ന പ്രീതിനടേശൻ, പരിചയപ്പെടുന്ന എല്ലാവർക്കും ചേച്ചിയാണ്. വെള്ളാപ്പള്ളി നടേശനെ നടേശൻ ചേട്ടനെന്നും, ജനറൽ സെക്രട്ടറി എന്നുമൊക്കെ അഭിസംബോധന ചെയ്യുന്നവർക്ക് ജനറൽ സെക്രട്ടറിയുടെ ഈ നിഴൽ ചേച്ചിയാണ്; സ്നേഹനിധിയായ മൂത്ത ചേച്ചി.

ആ ചേച്ചിയുമായി മുൻകൂട്ടി പറഞ്ഞതനുസരിച്ച് "മഹിളാരത്നത്തിനു വേണ്ടിയുള്ള ഒരു കൂടിക്കാഴ്ച യായി കണിച്ചുകുളങ്ങരയിലെ വീട്ടിലെത്തുമ്പോൾ സമയം, പറഞ്ഞിരുന്നതിൽ നിന്നും രണ്ട് മണിക്കൂറിലധികം വൈകിയിരുന്നു. തലേദിവസവും ഇങ്ങോട്ടുവി ളിച്ച് രാവിലെ തന്നെ എത്തണമെന്നും, അതുകഴിഞ്ഞ് മറ്റുചില അത്യാവശ്യ കാര്യങ്ങൾക്കു പോകേണ്ടതു ണ്ടെന്നും പറഞ്ഞിരുന്നതുകൊണ്ട് കൊല്ലത്തു നിന്നും രാവിലെ തന്നെ പുറപ്പെട്ടതാണ്. പക്ഷേ കോരിച്ചൊരിയുന്ന മഴയും റോഡിന്റെ ശോച്യാവസ്ഥയും കാരണം എത്തിച്ചേർന്ന സമയം 1.30. അത്രയും വൈകിയതിന് എന്തെങ്കിലും നീരസം പ്രകടിപ്പിച്ചാലോ എന്നുകരുതി, മുൻകൂർ മാപ്പപേക്ഷ എന്നപോലെ മഴയേയും മഴക്കുഴികളേയും പഴി പറഞ്ഞു കൊണ്ടായിരുന്നു കടന്നുചെന്നതു തന്നെ. എന്നാൽ ചേച്ചി എല്ലാം മനസ്സിലാക്കിക്കഴിഞ്ഞിരുന്നു. മഴ വല്ലാതെ വലച്ചു, അല്ലേ എന്നുള്ള ആശ്വാസചോദ്യത്തിന് പിറകെ ഊണിനുള്ള ക്ഷണം കൂടിയായപ്പോൾ ഈ സ്ത്രീയെ എല്ലാവരും ചേച്ചി എന്നു വിളിക്കുന്നത് വെറുതെയല്ല എന്ന് മനസ്സ് പറഞ്ഞു. പിന്നെ ശരിക്കും ഒരു മൂത്തചേച്ചിയെപ്പോലെ ഒപ്പമിരുന്ന്, സ്നേഹത്തോടെയുള്ള ഊട്ടും.

പിന്നെ അഭിമുഖത്തിനായി സിറ്റൗട്ടിലേക്ക്...

ശക്തമായ കാര്യങ്ങളൊന്നും ചോദിക്കുവാനുണ്ടായിരുന്നില്ലെങ്കിൽപ്പോലും, ചോദിക്കേണ്ട കാര്യങ്ങളുടെ ഒരേകദേശരൂപം മനസ്സിൽ അടുക്കി വച്ചിരുന്നു. പക്ഷേ അതിന്റെയൊന്നും ആവശ്യം ഉണ്ടായില്ല എന്നുള്ളതാണ് വാസ്തവം. അല്ലാതെ തന്നെ ചോദ്യവും ഉത്തരവും സ്വയം അനർഗ്ഗളപ്രവാഹമായി; ഔപചാരികത തെല്ലും ഇല്ലാതെ.

നഴ്സറിയിൽ തുടങ്ങിയ ബോർഡിംഗ് പഠനം