അംഗീകാരങ്ങളും അവഗണനകളും

സ്റ്റേജ് ഷോകളിലൂടെയും സിനിമകളിലൂടെയും പ്രശസ്തയായ അഞ്ജന അപ്പുക്കുട്ടൻ വിശേഷങ്ങൾ പങ്കുവയ്ക്കുന്നു

- എ.കെ.എസ്

സിനിമയിലെ പുതിയ വിശേഷങ്ങൾ എന്തൊക്കെയാണ്? ധ്യാൻ ശ്രീനിവാസൻ നായകനാകുന്ന ഒരു ത്രീഡി സിനിമയാണ് ഇപ്പോൾ ചെയ്തത്, അതി ലൊന്നാണ് ഞാൻ. ഒരു മോർച്ചറിയിൽ നടക്കുന്ന സംഭവമാണ് കഥ.

ഒഴുകി ഒഴുകി ഒഴുകി എന്ന സിനിമ ഒരുപാട് അവാർഡുകൾ നേടിയല്ലോ?

അതെ. ഒഴുകി ഒഴുകി ഒഴുകി ഞാനെന്റെ പ്രധാന മേഖലയായ കോമഡി മാറ്റിവച്ച സിനിമയാണ്. അതിൽ ഒരു ശതമാനം പോലും കോമഡി സീനു കൾ ഇല്ല. ഇന്റർനാഷണൽ അവാർഡുകളാണ് സിനിമയ്ക്ക് ലഭിച്ചത്. സഞ്ജീവ് ശിവന്റെ സംവിധാനം ആണെന്ന് ഞാൻ ആദ്യം അറിഞ്ഞിരുന്നില്ല. അത്രയും വലിയ സംവിധായകന്റെ കൂടെ ജോലി ചെയ്യാൻ കഴിഞ്ഞതുതന്നെയാണ് ഏറ്റവും വലിയ ഭാഗ്യം. അസ്സോസിയേറ്റുകളുമായും മേക്കപ്പിലെ ആളുകളുമായും എനിക്ക് മുന്നേ പരിചയമുണ്ടെങ്കിലും സിനിമയിലെ ഡി.ഒ.പിയെ ഒക്കെ ഞാൻ ആദ്യമായാണ് കാണുന്നത്. സിനിമയിൽ വഞ്ചി തുഴയുന്ന രംഗമൊക്കെയുണ്ട്. അതൊക്കെ പഠിച്ചെടുത്തത് നല്ലൊരു അനുഭവമായിരുന്നു.

എങ്ങനെയാണ് താങ്കൾ സിനിമയിലേക്ക് വരുന്നത്?

ഞാൻ നാലാം ക്ലാസിൽ പഠിക്കുന്ന സമയത്ത് മാതാഅമൃതാനന്ദമയിയുടെ ജീവിതം വിദേശരാജ്യങ്ങളിലെ ഭക്തർക്ക് അറിയിക്കാനായി അമ്മയുടെ ജിവചരിത്രം സംബന്ധിച്ച ഒരു സിനിമ ചെയ്തിരുന്നു. അതിൽ മാതാ അമൃതാനന്ദമയിയുടെ കുട്ടിക്കാലത്തെ വേഷമാണ് ഞാൻ ചെയ്തത്. പക്ഷേ അന്ന് പ്രത്യേകിച്ച് സിനിമാമോഹങ്ങളൊന്നും ഉണ്ടായിരുന്നില്ല.