അതിഥി ദേവോ ഭവഃ

മധുരമുള്ള ഇറച്ചി വിൽക്കുന്ന തെരുവിനെ സ്വീറ്റ് മീറ്റ് തെരുവാക്കി മാറ്റി

- എൻ.സി.

പുതുമയിലും പഴമ കാത്തുസൂക്ഷിക്കുന്ന മലബാറുകാരുടെ ഓണവിശേഷങ്ങളെക്കുറിച്ച് അറിയുമ്പോൾ പുതുതലമുറയ്ക്ക് ഒരത്ഭുതമായി തോന്നിയേക്കാം. സ്നേഹബന്ധങ്ങൾ കൂട്ടിയുറപ്പിക്കാൻ ഭക്ഷണ ത്തിന്റെ രുചിക്കൂട്ടിലൂടെ കഴിയുമെന്ന് തെളിയിച്ച, അതിഥി ദേവോ ഭവഃ എന്ന വിശ്വാസം മുറുകെ പിടിക്കുന്ന സാമൂതിരിയുടെ പ്രജകൾക്ക് ആതിഥ്യ മര്യാദയെക്കുറിച്ചല്ലാതെ എന്തുപറയാൻ. പറഞ്ഞുവരുന്നത് കോഴിക്കോടിനെക്കുറിച്ച് തന്നെയാണ്.

ഏറെ പറഞ്ഞുകേട്ട മിഠായിത്തെരുവിലൂടെ നടന്നപ്പോൾ ഒരു ചെറുപ്പക്കാരനെ പരിചയപ്പെട്ടു. റിഷിൽ കടപ്പമണ്ണിൽ. ഊർജ്ജസ്വലനായ ആ ചെറുപ്പക്കാരന്റെ മുഖം എവിടെയോ കണ്ടുമറന്നപോലെ തോന്നി. സീരിയലിലോ സിനിമയിലോ അഭിനയിച്ചിട്ടുണ്ടായിരുന്നോ എന്ന് ചോദിച്ചപ്പോൾ ചിരിച്ചുകൊണ്ട് പറഞ്ഞു. അഭിനയത്തേക്കാൾ ഏറെ ഇഷ്ടം സംവിധാനത്തോടായിരുന്നു. മധുമോഹൻ സാറിന്റെ അസിസ്റ്റന്റായിരുന്നു കുറച്ചുകാലം. സ്നേഹസീമ, മാനസി എന്നീ സീരിയലുകളിലും അഭിനയിച്ചു. അല്ലാതെ സിനിമയിൽ അഭിനയിച്ചിട്ടില്ല. കടയിൽ നിന്നും മാറിനിൽക്കാൻ കഴിയില്ല. അച്ഛന്റെ അച്ഛൻ തുടങ്ങിവച്ച ബിസിനസ്സാണ്. അച്ഛനു ശേഷം ഞാനത് തുടർന്നുപോകുന്നു.

മിഠായിയിൽ നിന്ന് തുടക്കം