പൊന്നാണ് ഈ പൊന്ന്

പതിനൊന്നു വർഷത്തെ ഇടവേളയ്ക്കു ശേഷം ഭാരോദ്വഹനത്തിൽ സ്വർണം നേടി ലിബാസ്

- രാഖി റാസ് 

ദേശീയ പവർലിഫ്റ്റിങ് മത്സര വേദിയിലേക്കു ലിബാസ് എന്ന പെൺകുട്ടിയും വാപ്പയും എത്തിച്ചേർന്നതു രഹസ്യമായാണ്. പങ്കെടുക്കാൻ ലഭിച്ച അവസരം നഷ്ടപ്പെടുത്താൻ കഴിയാത്തതു കൊണ്ടു മാത്രം.

ഭാരോദ്വഹന മത്സരം തുടങ്ങി. മകൾ വേദിയിലേറി. പവർ ലിഫ്റ്റിങ്ങിന്റെ പല റൗണ്ടുകൾ അവൾ അനായാസം കീഴടക്കി. ദേശീയ പവർ ലിഫ്റ്റിങ് ചാംപ്യൻഷിപ്പും നേടി.

വിജയികളെ തേടുന്ന പത്രക്കാരുടെ കണ്ണുവെട്ടിച്ച് അവർ വന്നതുപോലെ പുറത്തു കടന്നു. മറ്റു പല കായിക ഇനങ്ങളിലെയും സ്വർണ വിജയികൾ പത്രത്തിൽ വാർത്തയായി തിളങ്ങി നിന്നപ്പോൾ പവർ ലിഫ്റ്റിങ് ചാംപ്യനെ ആരും അറിഞ്ഞില്ല.

ലിബാസിന്റെ ജീവിതസ്വപ്നങ്ങളുടെ തിളങ്ങുന്ന ഏടായിരുന്നു അത്. അവിടെ വച്ചു തന്നെ അവൾ ആ പുസ്തകം അടച്ചു വച്ചു വിവാഹത്തിലേക്കു പ്രവേശിച്ചു.

ആ മത്സരത്തിനു ശേഷം പതിനൊന്നു വർഷങ്ങൾ കഴിഞ്ഞു. ലിബാസിന്റെ ജീവിതം ഇപ്പോൾ എങ്ങനെയായിരിക്കും എന്ന് ഊഹിക്കാൻ പ്രയാസമുണ്ടാകില്ല. പക്ഷേ, ഊഹങ്ങൾക്കപ്പുറത്താണ് ഇന്ന് ലിബാസ് പല കായിക താരങ്ങളും വിരമിക്കുന്നതിനെക്കുറിച്ചു ചിന്തിക്കുന്ന പ്രായത്തിൽ, തന്റെ മുപ്പത്തിയഞ്ചാംവയസ്സിൽ ഏഷ്യൻ പവർ ലിഫ്റ്റിങ്ങിൽ ഗോൾഡ് മെഡൽ നേടി ഗംഭീര തിരിച്ചുവരവു നടത്തി ലിബാസ്. ഏഷ്യൻ ചാംപ്യൻഷിപ്പിൽ മത്സരിച്ച ഏക അമ്മ ലിബാസായിരുന്നു.

“ഒരിക്കലും തിരിച്ചു വരാനാകുമെന്നു കരുതിയതല്ല. അതും രണ്ടു കുട്ടികളുടെ അമ്മയായ ശേഷം ഭർത്താവ് സാദിഖ് അലിയുടെ പ്രോത്സാഹനത്തിലാണു ഭാരോദ്വഹനത്തിലേക്കു വീണ്ടും വന്നത്. 2019 ൽ ആണ് ഏഷ്യൻ ചാംപ്യൻ ഷിപ്പിൽ ഗോൾഡ് മെഡൽ നേടുന്നത്.

ആ വിളിയിൽ നിന്നൊരു തുടക്കം

 സ്പോർട്സ് “തൊടുപുഴ വണ്ണപ്പുറം എന്ന ഗ്രാമത്തിലാണു വീട്. വാപ്പച്ചി പി.എച്ച്. ബാവയും ഉമ്മച്ചി ലൈലയും കുട്ടിക്കാലം മുതലേ ആർട്സിലും സ്പോർട്സിലും ചേരാൻ പ്രേരിപ്പിച്ചിരുന്നു. സഹോദരൻ ലാൽബിനും എനിക്കും ഇടയിൽ ആൺ പെൺ വേർതിരിവ് ഉണ്ടായിരുന്നില്ല. വാപ്പച്ചിക്കു ജോലി ഫയർഫോഴ്സിൽ. ഉമ്മച്ചിക്ക് ടെയ്ലറിങ് ഹോൾസെയിൽ ബിസിനസായിരുന്നു. സ്കൂൾ കാലത്തു ചാംപ്യൻഷിപ് മിക്കവാറും എനിക്കു തന്നെയായിരുന്നു.