தீர்மானம்

மெர்ஸிக்கு இதுவெல்லாம் ஒன்றும் தெரியவில்லை. ஆனாலும் அதனை வெளிக்காட்டிக் கொள்ளாமல் நன்கு பழகியவள் போல பிரிட்டோ சொல்வதைக் கேட்டு ஆமாம் என்று தலையசைத்தாள். பொய்யாட்டம்!

- அகராதி

'இங்கப் பாரு மெர்ஸி.. இனிமே எல்லாம் ஏறுமுகம்தான் எத்தனப்பேரு இந்த இடத்துக்கு நாக்கத் தொங்கப் போட்டுட்டு நிக்கறாங்கத் தெரியுமா உனக்கு முகவெட்டு இருக்கு. நான் போய் நல்ல ஆளா விசாரிச்சு இழுத்துட்டு வந்துடறேன். அப்றம் பாரு எப்படி வரிசைல வந்து நிக்கிறானுங்கன்னு” 

"சரி சரி.. சம்பளம் மத்த விவரமெல்லாம் விசாரிச்சிட்டு வந்துருங்கண்ணா"

"சொல்லிட்டில்ல.. மத்தத நான் பாத்துக்கறேன்"

சரியெனத் தலையாட்டிவிட்டு, பழையதைப் புதியதாக மாற்றித்தரும் டிங்கர் செல்வத்திடம் சகாய விலையில் வாங்கியிருந்தக் காரில் ஏறி யூ டியூப் சேனல் ஒன்றின் பேட்டிக்குச் சென்றாள். பிரிட்டோ கண்டிப்பாகக் கூறிவிட்டான் இத்துடன் கடைசி இதுபோல் பேட்டிக்கென அவர்கள் இடத்திற்கு போவதை நிறுத்திக்கொள்ள வேண்டும். இனிமேல் அவர்களைத்தான் நாம் இடம், நேரம் சொல்லி வரச்சொல்ல வேண்டுமென்று.. பிரிட்டோ உறவுக்கார அண்ணன் இல்லை. இப்போதுதான் பழக்கம். காட்சி ஊடகங்களின் நெளிவு சுளிவுகளை அநாயாசமாக ஊதித் தள்ளுகிறான். இப்படி ஓர் அண்ணன் அறிமுகமானதில் மெர்ஸிக்கு அளவற்ற சந்தோஷம்.