தாடியும் தந்தையும் அருட்தந்தையும்!

கர்ணனின்‌ கவச குண்டலத்தைப்‌ போல்‌, இவனுடன்‌ ஒட்டிப்‌ பிறந்ததாய்‌ ஆகிவிட்டது இவன்‌ தாடி!

இவனை அடையாளப்படுத்த, எவருக்கும்‌ எவிதில்‌ கைவருகிற ஒரு கைகாட்டி அது! திருமணத்தில்‌, மனசும்‌ மனசும்‌ கலந்த காதலியைக்‌ கைப்பிடித்து, அவருடன்‌ இவன்‌ மாலை மாற்றிக்கொண்டதும்‌ தாடியுடன்தான்‌! அம்மா மறைந்தபோதுகூட, தலையை/நீண்ட தாடியைச்‌ சிரைக்கச்‌ சங்கடப்பட்டு மழிக்காததால்‌, பிண்டம்‌ போடும்‌ சடங்கிலிருந்து விலக்கி வைக்கப்பட்டவன்‌. எத்தனைப்‌ பெரிய நிகழ்ச்சியாயிருந்தாலும்கூட, தாடியைத்‌ தவிர்த்துவிட்டு இவன்‌ மட்டும்‌ முகங்காட்டப்‌ போனதே இல்லை. தாடியுடன்‌ இருப்பதென்பது இவனுக்கு என்றும்‌ சிரமமாயிருந்ததில்லை. தாடி இப்படி வளர்ந்தால்‌ தாடையில்‌ அரிப்பெடுக்காதா எனும்‌ மற்றவர்களின்‌ அச்சம்‌ ஒரு சிறு மயிரளவுகூட இவனிடம்‌ வாலாட்டியதில்லை. இவனது தாடியைப்‌ பார்த்துப்‌ பெரியாரைப்‌ பிடிக்குமோ என்று கேட்டு ஒதுங்கியவர்களும்‌ உண்டு; உறவு கொண்டவர்களும்‌ உண்டு; அவர்‌ மாதிரியே இருக்கிறதென்று சான்றிதழ்‌ வழங்கியவர்களும்‌ உண்டு. ஆனால்‌ இதெல்லாம்‌ இவனே சம்பாதித்து இவன்‌ காலில்‌ நிற்கத்‌ தொடங்கிய பிறகுதான்‌! இவன்‌ ஆசிரியர்‌ வேலைக்கு விண்ணப்பிக்கையில்கூட, இவனைத்‌ தன்‌ மகனாகப்‌ பார்த்துக்கொண்ட இவனின்‌ பேராசிரியர்தான்‌ சொன்னார்‌*இண்டர்வியூவிற்குப்‌ போம்போது ஷேவ்‌ பண்ணிட்டு கொஞ்சம்‌ டீசெண்ட்டா போப்பா'. தாடிக்கு அப்பொழுது ஒருமுறை இவன்‌ இரங்கற்பா பாடியது நடந்தது. இப்பொழுதெல்லாம்‌ அதற்கெந்தக்‌ குந்தகமும்‌ வந்ததில்லை-வரவிட்டதுமில்லை! தாடியின்‌ மயிர்க்கால்களில்‌ இவனது மானம்‌ உயிருரமாய்‌ உறைந்திருப்பதாய்க்‌ கருதினான்‌.