മാറ്റം അറിയാതെ വന്ന മാറ്റം

98 വർഷം പ്രായമായ വീടിന്റെ തനിമയെ ബാധിക്കാതെ പുതിയ ജീവിതശൈലിക്കു വേണ്ട ഘടകങ്ങൾ കൂട്ടിച്ചേർത്തപ്പോൾ 

- ശ്രീദേവി

പുതുക്കിപ്പണിതു എന്നു പറഞ്ഞിട്ട് വീടിന് മാറ്റമൊന്നും കാണാനില്ലല്ലോ എന്നാണ് കുര്യൻ പുന്നുസിനോടും ജീനയോടും ബന്ധുക്കളും സുഹൃത്തുക്കളും ചോദിക്കുന്നത്. 98 വർഷം പഴക്കമുള്ള വീടിന്റെ ഭംഗിയും തനിമയും ചോരാതെ വീട് പുതുക്കിയെടുത്ത മകൾ അനുപയുടെ ആർക്കിടെക്ട് എന്ന നിലയിലുള്ള കഴിവിൽ അഭിമാനം കൊള്ളുകയാണ് ഈ ദമ്പതികൾ.

കോട്ടയം ജില്ലയിലെ തോട്ടയ്ക്കാടിന്റെ ഗ്രാമാന്തരീക്ഷത്തിലാണ് കുര്യൻ ജീന ദമ്പതികളുടെ വീട്. സറ്റൈനബിൾ ആർക്കിടെക്ചറിന്റെയും കേരള പ്രാദേശിക വാസ്തുവിദ്യയുടെയും കടുത്ത ആരാധികയായ അനുപ, വീടിന്റെ തനിമയ്ക്ക് കോട്ടം തട്ടാതെ വീടിനെ പുതിയ ജീവിതശൈലിയോട് ഇണക്കിച്ചേർക്കുകയായിരുന്നു.

“പുതുക്കിയത് പെട്ടെന്ന് തിരിച്ചറിയില്ല എന്ന് ആളുകൾ പറയുമ്പോൾ ഞാൻ വളരെ ഹാപ്പിയാണ്. പഴയ വീടിന്റെ തനിമ നിലനിർത്തി വളരെ സൂക്ഷ്മമായാണ് ഓരോ ഘട്ടവും മുന്നോട്ടു പോയത്,'' അനുപ പറയുന്നു.

അനുപയുടെ മുതുമുത്തച്ഛൻ പണി കഴിപ്പിച്ച വീടാണിത്. വെട്ടുകല്ലും കുമ്മായവും കൊണ്ട് ഭിത്തികളും തടി കൊണ്ടുള്ള മേൽക്കൂരയും.

“പിന്നീട് കോൺക്രീറ്റ് വ്യാപകമായിത്തുടങ്ങിയ കാലത്ത് മുത്തച്ഛൻ മുൻവശത്ത് രണ്ട് മുറികൾ കൂട്ടിച്ചേർത്തു. പൂമുഖത്തിന്റെ ഇരുവശങ്ങളിലേക്കും കൂട്ടിയെടുത്ത ഒരു മുറി ലൈബ്രറിയും മറ്റേത് കിടപ്പുമുറിയുമായിരുന്നു.'' ഇവിടെ മാത്രമായിരുന്നു വീടിന്റെ മറ്റു ഭാഗങ്ങളോടു ചേരാത്ത വിധത്തിൽ കോൺക്രീറ്റ് സ്ലാബ് ഉണ്ടായിരുന്നതെന്ന് അനുപ ഓർമിക്കുന്നു.

അവിചാരിതമായ തുടക്കം