મનીષા વાળા: એનો રે મુક્કો, એની રે લાત..

કિક બૉક્સિંગ એ ભારત માટે તદ્દન નવી રમત છે. ગુજરાત સરકાર પણ હજી આ ખેલ વિશે અભ્યાસ કરીને એને સત્તાવાર માન્યતા આપવા પા.. પા.. પગલી ભરી રહી છે ત્યારે કોડીનારની એક દીકરીએ છલાંગ લગાવી અનેક પડકારોને પાર કરીને આ રમતમાં આંતરરાષ્ટ્રીય સ્તરે મેડલ હાંસલ કરીને ગુજરાતને ગૌરવ અપાવ્યું છે.

- દેવેન્દ્ર જાની

સૌરાષ્ટ્રના નાના શહેર કોડીનારની એક શાળામાં સાતમા ધોરણમાં અભ્યાસ કરતી દીકરી સપનું જુવે છે કે એક દિવસ સ્પોર્ટ્સના ફીલ્ડમાં આંતરરાષ્ટ્રીય સ્તરે રમવું છે. મધ્યમ વર્ગની આ દીકરીના વતનમાં ખેલસુવિધા બહુ પાંગળી હતી એટલે એના સપનાને વાસ્તવિકતાની પાંખો મળશે કે કેમ એ સો મણનો સવાલ હતો. અલબત્ત, એ કન્યાના કઠોર પરિશ્રમ અને અભૂતપૂર્વ આત્મવિશ્વાસનું નક્કર પરિણામ આવ્યું. આ દીકરી અર્થાત્ મનીષા વાળાએ કિક બૉક્સિંગની રમતમાં ઈન્ટરનૅશનલ કક્ષાએ ગુજરાતની ફર્સ્ટ ફિમેલ ફાઈટર બનવાની સિદ્ધિ મેળવી.

વિદેશમાં વર્ષોથી રમાતા આ ખેલને ગુજરાત સરકારના રમતગમત વિભાગ દ્વારા માન્યતા આપવા હજી ખાતાકીય પ્રક્રિયા ચાલી રહી છે. સમજો કે ગુજરાતમાં કિક બૉક્સિંગનો પાયો પણ નખાયો નથી ત્યાં મનીષા વાળાએ થોડા સમય અગાઉ થાઈલૅન્ડમાં યોજાયેલી કિક બૉક્સિંગ સ્પર્ધામાં બે બ્રોન્ઝ મેડલ મેળવી એની પ્રતિભાનો પરિચય આપ્યો. ૨૦ દેશોના ૫૦૦ ખેલાડીના સહભાગવાળી આ સ્પર્ધામાં મેડલ લીધા પછી મનીષા હવે આવતા નવેમ્બર દરમિયાન પોર્ટુગલમાં રમાનારી વર્લ્ડ ચૅમ્પિયનશિપની સ્પર્ધામાં શાનદાર દેખાવ કરવા માટે તૈયારી કરી રહી છે. અત્યારે એ વડોદરામાં કોચિંગ મેળવી રહી છે.

થાઈલૅન્ડમાં યોજાયેલી કિક બૉક્સિંગ સ્પર્ધામાં જીત્યા બે બ્રોન્ઝ મેડલ.