કાળમુખો કોરોના નવા સ્વરૂપે ફરી ત્રાટકવાની તૈયારી કરી રહ્યો છે..

દેશમાં અત્યારે મંદ જણાતી કોરોનાની નવી લહેર ક્યારે વાવાઝોડાનું સ્વરૂપ ધારણ કરી લે એ કહેવાય નહીં. આ આતંકી વાઈરસ ધીમી પણ મક્કમ ગતિએ નવા વેરિયન્ટ સાથે વકરી રહ્યો છે ત્યારે સારવાર સાથે સાવચેતી અને સજ્જતા એ જ એકમાત્ર ઉપાય છે.

- મહેશ શાહ (અમદાવાદ)

૧૯ માર્ચનો દિવસ અમદાવાદીઓને યાદ હશે. ત્રણ વર્ષ પહેલાં આ દિવસે કોરોનાનો પહેલો કેસ અમદાવાદમાં નોંધાયો. પછી તો કોરોના-સંક્રમણના લીધે અમદાવાદ હૉટ સ્પૉટ બન્યું અને કોરોનાના કેન્દ્રબિંદુ (એપિસેન્ટર) તરીકે કુખ્યાત પણ થયું.

ત્રણ વર્ષ બાદ, ૨૦૨૩ની ૧૯ માર્ચે પણ અમદાવાદમાં કોરોનાના દરદીઓ જોવા મળ્યા. ખાસ તો અગાઉની જેમ આ વખતે પણ કોરોનાએ ગુજરાતમાં અમદાવાદથી એન્ટ્રી કરી. ફેબ્રુઆરીથી શરૂ થયેલા નવેસરના ઉત્પાતથી કેસ ધીરે ધીરે વધી રહ્યા છે. આ લહેરમાં ગુજરાતમાં કોરોનાના ૩૭૯૦ ઍક્ટિવ કેસ નોંધાયા, જેમાંના અમુકે હૉસ્પિટલમાં સારવાર લીધી, અમુક હોમ-આઈસોલેશનમાં રહ્યા તો સાત દરદીનાં મૃત્યુ થયાં.

ત્રણ વર્ષ પહેલાં અમદાવાદમાં કોરોનાના કેસ વધતા હતા ત્યારે કોરોના-સંક્રમણ અટકાવવા શહેરના તત્કાલીન મ્યુનિસિપલ કમિશનર વિજય નેહરાએ ટ્રેકિંગ, ટેસ્ટિંગ અને ટ્રીટમેન્ટને મહત્ત્વ આપ્યું હતું, પરંતુ અમુક લોકોએ કોરોનાના કેસ વધવાની ભીતિ દર્શાવીને એનો વિરોધ કર્યો.

હવે કોરોના ફરી માથું ઊંચકી રહ્યો છે ત્યારે ગુજરાત સરકારે ફરીથી ટ્રેકિંગ, ટેસ્ટિંગ અને ટ્રીટમેન્ટને અમલમાં મૂકી કોવિડના કેસ કે શંકાસ્પદ લક્ષણ ધરાવતી વ્યક્તિઓ માટે વહેલું નિદાન અને સમયસર સારવારની વ્યવસ્થા ગોઠવી છે. આ ઉપરાંત, કોવિડ-૧૯ ટાસ્ક ફોર્સ સક્રિય બનાવીને બેઠકો શરૂ કરી છે.

પાણી પહેલાં પાળઃ અગાઉના અનુભવના આધારે આ વખતે ગુજરાત-મહારાષ્ટ્ર સહિતની સરકારે કોરોનાના દરદીઓ માટે અલાયદા વૉર્ડની જોાવાઈ કરવા માંડી છે તો કોવિડ પ્રતિરોધક રસીકરણની ઝુંબેશ પણ નવેસરથી શરૂ થશે.