સમૃદ્ધ ગણાતા પશ્ચિમ અમદાવાદમાં કુલ ૨૭ સ્થળોએથી સિલ્વર ટ્રોલી ઉપાડવાની રહેશે

પશ્ચિમ ઝોનમાં ૧૫, ઉત્તર-પશ્ચિમ ઝોનમાં ચાર અને દક્ષિણ-પશ્ચિમ ઝોનમાં આઠ સ્થળો ન્યૂસન્સ સ્પોટ

અમદાવાદ, સોમવાર

મ્યુનિ. કમિશનર એમ. થેન્નારસને રખડતાં ઢોરના ત્રાસમાંથી લોકોને રાહત આપવા શહેરમાં કુલ ૯૭ સ્થળોએ મુકાયેલી કચરાની સિલ્વર ટ્રોલી હટાવીને તે સ્થળે બ્યુટિફિકેશન કરવાનો આદેશ અધિકારીઓને આપ્યો છે. ઉત્તર ઝોનમાં સૌથી વધુ ૨૮ સ્થળે સિલ્વર ટ્રોલી ગોઠવાઈ હોઈ તે ઝોનમાં ન્યૂસન્સ સ્પોટની સમસ્યા સૌથી વધુ છે, જોકે શહેરના સુખી અને સમૃદ્ધ ગણાતા પશ્ચિમ અમદાવાદમાં પણ કુલ ૨૭ સ્થળોએ સિલ્વર ટ્રોલી મુકાઈ છે. આ સ્થળોએ કચરો ફેંદવા રખડતાં ઢોર ફરતાં હોઈ તેને ત્યાંથી હટાવી લેવાની તાકીદે જરૂર ઊભી થઈ છે.