ഇന്ത്യൻ സർക്കസിന്റെ കുലപതി

ജെമിനി ശങ്കരേട്ടൻ വിടവാങ്ങിയപ്പോൾ

- സുധീര്‍നാഥ്‌

ഇന്ത്യൻ സർക്കസിന്റെ കുലപതിയായ ജെമിനി ശങ്കരൻ ജീവിതചക്രം പൂർത്തീകരിച്ച് വിടപറഞ്ഞിരിക്കുന്നു. വരുന്ന ജൂൺ 13ന് നൂറാം പിറന്നാൾ ആഘോഷിക്കുന്നതിന് ദിവസങ്ങൾക്ക് മുൻപ് ഏപ്രിൽ 23 ന് രാത്രി 11.45നാണ് അദ്ദേഹം ലോകത്തോട് യാത്ര പറഞ്ഞത്. ആഘോഷങ്ങൾക്കും സൽക്കാരങ്ങൾക്കും എന്നും വലിയ പ്രാധാന്യം നൽകിയിരുന്ന ശങ്കരേട്ടൻ തന്റെ നൂറാം പിറന്നാൾ വലിയ രീതിയിൽ നടത്തണമെന്ന് ആഗ്രഹം പ്രകടിപ്പിച്ചിരുന്നു. ശാരീരികമായി അവശതയിൽ കിടക്കുമ്പോഴും തന്റെ നൂറാം പിറന്നാളിന്റെ ആഘോഷങ്ങളെക്കുറിച്ച് മാത്രമായിരുന്നു അദ്ദേഹം ചിന്തിച്ചിരുന്നത്.

അവശനിലയിലായ ശങ്കരേട്ടനെ കാണുവാൻ മുഖ്യമന്ത്രി പിണറായി വിജയൻ തന്നെ എത്തി. അദ്ദേഹം നിർബന്ധിച്ച് കരിക്കിൻ വെള്ളം കുടിപ്പിച്ചു. ഭക്ഷണം കഴിക്കണമെന്ന് പറഞ്ഞപ്പോൾ കൊച്ചുകുട്ടിയെ പോലെ ശങ്കരേട്ടൻ സമ്മതം മൂളി. പക്ഷേ അദ്ദേഹം തുടർന്നുള്ള ദിവസങ്ങളിൽ കൂടുതൽ ക്ഷീണിച്ചു. ഭക്ഷണം തീരെ കഴിക്കാതായി. മലയാളികളുടെ പ്രിയപ്പെട്ട എഴുത്തുകാരൻ എം. മുകുന്ദനുമായി ഈ ലേഖകൻ കഴിഞ്ഞ മാർച്ച് മാസം അവസാനം ശങ്കരേട്ടനെ കാണാൻ പോയിരുന്നു. ആരേയും തിരിച്ചറിയാൻ സാധിക്കാതെ ഉറക്കത്തിലായിരുന്നു ശങ്കരേട്ടൻ. തുടർന്നുള്ള ദിവസങ്ങളിൽ ട്രിപ്പിട്ടാണ് ഗ്ലൂക്കോസ് നൽകിയിരുന്നത്. അതായിരുന്നു കഴിഞ്ഞ ഒരുമാസത്തെ ശങ്കരേട്ടന്റെ ജീവൻ നിലനിർത്തിയത്.