സുപ്രീംകോടതി വിധി അട്ടിമറിക്കുന്ന ഓർഡിനൻസ് ജനാധിപത്യം അവസാനിക്കുന്നതിന്റെ സൂചന ?

തങ്ങൾക്ക് ഹിതകരമല്ലാത്ത ഏത് തീരുമാനം ആരുടെ ഭാഗത്തു നിന്നുണ്ടായാലും, ഭരണപക്ഷത്തിന്റെ നയനിലപാടുകളെ തുറന്നെതിർക്കുന്നവരാരായാലും അവരെ തികഞ്ഞ അസഹിഷ്ണുതയോടെയും ഹിംസാത്മകമായി നേരിടുക എന്നതാണ് മോദി സർക്കാർ സ്വീകരിച്ചു പോരുന്ന ശൈലി.

- ചെറുകര സണ്ണീലൂക്കോസ്

ഇന്ത്യൻ ജനാധിപത്യത്തിന്റെ സംരക്ഷണത്തിനും അതിന്റെ നിലനിൽപ്പിനും പല സന്ദർഭങ്ങളിലും ജുഡീഷ്യറിയുടെ ഇടപെടലുകൾ സഹായിച്ചിട്ടുണ്ട്. ഭരണകൂടങ്ങൾ ജനാധിപത്യ മൂല്യങ്ങളിൽ നിന്ന് വ്യതിചലിച്ച പല സന്ദർഭങ്ങളിലും സുപ്രീംകോടതി തിരുത്തിയിട്ടുണ്ട്. എന്നാൽ ജുഡീഷ്യറിയും ഭരണനേതൃത്വത്തിന് വിധേയപ്പെട്ടു പ്രവർത്തിക്കണമെന്ന ലക്ഷ്യത്തോടെ ന്യായാധിപരുടെ മേൽ പ്രലോഭനങ്ങളും സമ്മർദ്ദങ്ങളും ഭീഷണികളും ഭരണകൂടം പ്രയോഗിക്കുന്നത് രാജ്യത്തെ ജനങ്ങൾ കണ്ടു കൊണ്ടാണിരിക്കുന്നത്.

പൂർണ്ണമായല്ലെങ്കിലും ജുഡീഷ്യറിയിലെ വലിയ ഒരു വിഭാഗം ഭരണനേതൃത്വത്തിന് വിധേയപ്പെട്ടുകഴിഞ്ഞു എന്ന് ബോധ്യപ്പെടുത്തുന്ന പല വിധികളും സമീപകാലത്തുണ്ടായിട്ടുണ്ട്. എന്നാൽ ഭരണ കൂട സമ്മർദ്ദങ്ങൾക്ക് വഴങ്ങാതെ കൈക്കൊള്ളുന്ന വിധികളെ മറികടക്കാൻ ഏതറ്റംവരെയും പോകാൻ മടിക്കില്ലെന്ന് നരേന്ദ്ര മോദി സർക്കാർ ഇതിനോടകം പലവട്ടം തെളിയിച്ചുകഴിഞ്ഞു.

തങ്ങൾക്ക് ഹിതകരമല്ലാത്ത ഏത് തീരുമാനം ആരുടെ ഭാഗത്തു നിന്നുണ്ടായാലും, ഭരണപക്ഷത്തിന്റെ നയനിലപാടുകളെ തുറന്നെതിർക്കുന്നവരാരായാലും അവരെ തികഞ്ഞ അസഹിഷ്ണുതയോടെയും ഹിംസാത്മകമായി നേരിടുക എന്നതാണ് മോദി സർക്കാർ സ്വീകരിച്ചു പോരുന്ന ശൈലി.

പ്രതിപക്ഷത്തെ ഏറ്റവും പ്രധാന നേതാവായ രാഹുൽഗാന്ധിയുടെ വിമർശനസ്വരവും സാന്നിദ്ധ്യവും ഒഴിവാക്കാൻ ഭരണകൂടം പാർലമെന്റിനകത്തും പുറത്തും നടത്തിയ കുത്സിത ശ്രമങ്ങളെല്ലാം രാജ്യം കണ്ടതാണ്. പ്രതിപക്ഷമില്ലാത്ത രാജ്യഭരണം ആഗ്രഹിക്കുന്ന മോദി ഭരണകൂടത്തിന്റെ നടപടികളിലവസാനത്തേതുമാത്രമാണ് ഡെൽഹി സർക്കാരിന് ജീവനക്കാർക്ക് മേലുള്ള അധികാരം തിരിച്ചുപിടിക്കാൻ ഓർഡിനൻസ് ഇറക്കിയ നടപടി.