வாழ்க்கை ஒரு பழைய மீன் குழம்பு

நான்கு வருடங்களுக்கு முன்பு வாங்கிய ரெடிமேட் சட்டை. கலர் பிடித்துப்போக கடைக்காரரிடம் எனது சட்டை அளவைக் கேட்க, அவர் அளவை குறைத்துக் கூற, அவசரத்தில் ட்ரயல் ரூமுக்குப் போகாமலே வாங்கிய சட்டை.

- சாதிக்

திருவிழா அன்று சட்டையைப்‌ போடும்பொழுது தொப்பையை இறுக்கி ப்ளவுஸ்‌ போன்று காட்சியளித்த சட்டையை அன்று ஒருவேளை போட்டதுடன்‌, பீரோவின்‌ எல்லாச்‌ சட்டைகளின்‌ கீழே நன்றாக அயர்ன்‌ செய்த சட்டை உறங்கிப்போக அதை மறந்துவிட்டேன்‌. கடைக்காரர்‌ தவறென்றெல்லாம்‌ சொல்லிவிட்டுத்‌ தப்பிக்க முடியாது. ஒருநாள்‌ கூத்துக்கு மொட்டை அடிச்ச கதையாகப்‌ போச்சு அந்த சட்டைக்‌ கதை. ஒருதடவை பயன்படுத்திய சட்டையை திரும்பக்‌ கொடுத்தால்‌ எவன்‌ வாங்குவான்‌? எல்லாம்‌ அவசரத்திலும்‌ நமது அதிமேதாவித்தனத்திலும்‌ விளைந்த தவறென, அதை யாரிடமும்‌ பகிர்ந்து கொண்டதில்லை. இதை என்‌ மனைவியும்‌ கண்டுகொண்டதில்லை. அவளிடம்‌ எத்தனை சேலை இருக்கிறதென்று எனக்குத்‌ தெரியாதது போல என்னிடம்‌ எத்தனை சட்டை இருக்கிறதென்பதெல்லாம்‌ என்‌ மனைவியும்‌ கண்டுகொண்டதில்லை, அல்லது அதைப்‌ பற்றிப்‌ பொருட்படுத்தவில்லை, அல்லது இதெல்லாம்‌ தேறாத கேசுன்னு லூசுல விட்டிருக்கலாம்‌. எப்படியோ சட்டையப்‌ பத்தி கேள்வி எதுவும்‌ கேக்கல. அப்பாடா, தப்பிச்சேன்‌.