யமுனா

"அக்கா... ஒரு நிமிஷம் நில்லுங்க" என் கையை இறுகப் பிடித்துக்கொண்டு அந்தச் சாலை வளைவை சுற்றும் முற்றும் பார்த்தவள் மிரளும் கண்களோடு 'அக்கா... இந்த சந்துலதான் அன்னைக்கு வழிதெரியாம தொலைஞ்சு போயிட்டேன்.

இங்க வரக்கூடாது. வாங்கக்கா போய்டலாம்" அவசரமாய் திரும்பி ஓடியவள் சற்று தொலைவுக்குப்போய் 'அக்கா வந்துடுங்க. இன்னிக்கும் தொலைஞ்சு போய்ட்டோம்ன்னு தெரிஞ்சா எங்கம்மா கிட்ட அடி கிடைக்கும்' என்று சொல்லி ஓடியே விட்டாள்.

ம்ம்‌.. நானும்‌ இனி அத்தெருவில்‌ தொலைந்து போகமாட்டேன்‌ யமுனா.

அன்றொரு இரவில்‌ "நாய்ன்னா எனக்கு ரொம்ப பயம்‌ அக்கா' என்று பயத்தில்‌ உருளும்‌ கண்களோடு சொல்லி சற்று எட்டியே நின்று கையை மட்டும்‌ நீட்டி நீட்டி, சாலையோர நாய்களுக்கு உணவு வைத்த வேகத்தில்‌ "அக்கா வந்துடுங்க.. வந்துடுங்க" என்று கிசுகிசுப்பாய்‌ அலறிக்கொண்டே ஓடிவிட்டாள்‌.

"அந்த ஜீவன்களுக்கு உன்னை ரொம்பப்‌ பிடிக்கும்‌.. ஓடாதே யமுனா.."

"அக்கா.. எங்கப்பா யாருக்கோ நிறைய பணம்‌ குடுக்கணுமாம்‌. நேத்து யாரோ எங்க வீட்டுக்கு வந்து எங்கப்பாவைத்‌ திட்டிட்டு போனாங்க. அதுக்காகத்தான்கா நான்‌ காசு சேர்க்கறேன்‌" என்றவள்‌ இரண்டு ரூபாய்‌ நாணயத்தை அவளது உண்டியலுக்குள்‌ போட்டு "இந்தாக்கா.. இத நீங்களே வெச்சிருங்க. நிறைய பணம்‌ சேர்ந்தபிறகு வாங்கிக்கிறேன்‌. எங்கம்மாகிட்ட சொல்லிடாதீங்க சரியா" என்றாள்‌.

"ம்ம்‌.. பத்திரமா வெச்சிருப்பேன்‌ யமுனா."