ஆஸ்திரேலிய தொடருக்கு நடுவே சர்வதேச கிரிக்கெட்டில் இருந்து தமிழக வீரர் அஸ்வின் ஓய்வு!

சிறந்த ஆல்ரவுண்டராக திகழ்ந்தவர்!!

சர்வதேச அளவில் தலைசிறந்த சுழற்பந்து வீச்சாளராகவும், ஆல்ரவுண்டராகவும் திகழ்ந்த தமிழக வீரர் ரவிச்சந்திரன் அஸ்வின், சர்வதேச கிரிக்கெட்டில் அனைத்து விதமான போட்டிகளில் இருந்தும் ஓய்வு அறிவித்துள்ளார்.

பெறுவதாக நடப்பு ஆஸ்திரேலிய தொடரில் எஞ்சியுள்ள 2 போட்டிகளில் இருந்தும் அவர் விலகியுள்ளார்.

இந்தியா-ஆஸ்திரேலியா அணிகளுக்கு இடையேயான பார்டர்-கவாஸ்கர் தொடரின் 3ஆவது டெஸ்ட் கிரிக்கெட் போட்டி இரவில் முடிந்தது. இந்த போட்டிக்குப் பிறகு, செய்தியாளர் சந்திப்பில் பங்கேற்க வந்த கேப்டன் ரோகித் சர்மாவுடன், அஸ்வினும் வந்தார்.

அப்போது, செய்தியாளர்களிடம் உரையாற்றிய அஸ்வின், சர்வதேச கிரிக்கெட் போட்டிகளில் இருந்து விலகுவதாக அறிவித்தார். மேலும், சகவீரர்களுக்கும், இந்திய கிரிக்கெட் வாரியத்திற்கும் அவர் நன்றி தெரிவித்துப் பேசினார்.

முன்னதாக, இன்றைய கடைசி நாள் போட்டி மழையால் பாதிக்கப்பட்ட நிலையில், இந்திய வீரர்கள் விராட் கோலியும், அஸ்வினும் டிரெஸ்ஸிங் ரூமில் வானத்தை வெறித்துப் பார்த்தபடி அமர்ந்திருந்தனர்.

இந்த காட்சியை திரையில் காட்டிய போது, திடீரென எழுந்து அஸ்வினை கட்டித்தழுவி விராட் கோலி பாராட்டினார்.