மூளைச்சாவு அடைந்ததாக தகவல்: 'புஷ்பா-2' நெரிசலில் சிக்கிய சிறுவனும் கவலைக்கிடம்!

அல்லு அர்ஜூன் ஜாமினுக்கு எதிராக தெலுங்கானா போலீஸ் மேல்முறையீடு!!

புஷ்பா 2 படத்தின் சிறப்புக் காட்சியை காணச் சென்ற பெண் கூட்ட நெரிசலில் சிக்கி உயிரிழந்த நிலையில், அவரது 9 வயது மகன் பலத்த காயங்களுடன் மருத்துவமனையில் அனுமதிக்கப்பட்டுள்ளான்.

அங்கு சிறுவனுக்கு தொடர் சிகிச்சை அளிக்கப்பட்டு வந்த நிலையில், தற்போது சிறுவன் மூளைச்சாவு அடைந்ததாகவும், உடல்நிலை மிகவும் கவலைக்கிடமாக இருப்பதாகவும் வெளியாகியுள்ளது. இதனிடையே நடிகர் அல்லு அர்ஜூனுக்கு ஐதராபாத் உயர்நீதிமன்றம் அளித்த இடைக்கால ஜாமினுக்கு எதிராக தெலுங்கானா போலீசார் உச்சநீதிமன்றத்தில் மனுதாக்கல் செய்ய முடிவு செய்துள்ளதாக கூறுகின்றன.

தகவல்கள் டிகர் அல்லு அர்ஜூன், நடிகை ராஷ்மிகா நடிப்பில் வெளியான புஷ்பா 2 திரைப்படம் கடந்த டிசம்பர் 5ஆம் தேதி வெளியாகி ஒரு வாரத்தில் ரூ.1000 கோடி வசூலை வாரிக்குவித்தது. முன்னதாக கடந்த டிசம்பர் 4ஆம் தேதி இரவு 10 மணியளவில் ஐதராபாதில் உள்ள சந்தியா திரையரங்கில் படத்தின் சிறப்புக்காட்சி திரையிடப்பட்டது.

அப்போது ரசிகர்களுடன் சேர்ந்து படத்தைக் காண நடிகர் அல்லு அர்ஜூன், ராஷ்மிகா உள்ளிட்ட பிரபலங்கள் வருகை புரிந்தனர். திரையரங்கிற்கு வரும் பிரபலங்களை காண பல ஆயிரக்கணக்கான மக்கள் ஒரே நேரத்தில் கூடியதால் பெரும் தள்ளுமுள்ளு ஏற்பட்டது. போலீசார் தடியடி நடத்தி கூட்டத்தைக் கலைத்தனர்.

இந்த சம்பவத்தில் ரேவதி என்ற 39 வயது பெண் கூட்ட நெரிசலில் சிக்கி பலியானார். அவரது 9 வயது மகனும், பலத்த காயம் அடைந்து மருத்துவமனையில் சிகிச்சைக்காக சேர்க்கப்பட்டான். சிறுவனின் மருத்துவ செலவுகளை புஷ்பா 2 படக்குழுவே ஏற்றது.

இந்த சம்பவம் தொடர்பாக நடிகர் அல்லு அர்ஜூன் மீதும், திரையரங்க உரிமையாளர், மேலாளர் உள்ளிட்டோர் மீதும் போலீசார் வழக்குப் பதிவு செய்தனர்.

கூட்ட நெரிசலில் பெண் இறந்த சம்பவம் பெரும் அதிர்ச்சியை ஏற்படுத்தியதாகக் கூறிய அல்லு அர்ஜூன், இது தொடர்பாக வருத்தம் தெரிவித்து வீடியோ பதிவு ஒன்றை வெளியிட்டார். அத்துடன் இறந்த பெண்ணின் குடும்பத்திற்கு ரூ.25 லட்சம் இழப்பீடு வழங்குவதாகவும், பாதிக்கப்பட்ட குடும்பத்தினரை நேரில் சென்று சந்திப்பதாகவும் கூறினார்.