எடப்பாடி சந்திப்பு எதிரொலி: அண்ணாமலை இன்று திடீர் டெல்லி பயணம்!

மத்திய அமைச்சர் அமித்ஷாவுடன் பேசுகிறார்!!

- 

எடப்பாடி சந்திப்பை தொடர்ந்து அமித்ஷாவை சந்திக்க அண்ணாமலை இன்று திடீரென டெல்லி புறப்பட்டுச் சென்றார்.

2026 சட்டமன்ற தேர்தல் எதிர்கொள்ளும் வகையில் பா.ஜ.க.வுடன் கூட்டணி அமைக்க அ.தி.மு.க. தயாராகி வருவதாக கூறப்பட்டும் நிலையில் தலைநகர் டெல்லியில் பொதுச் செயலாளர் எடப்பாடி பழனிசாமி, உள்துறை அமைச்சர் அமித்ஷாவை சந்தித்துப் பேசினார். இந்த சந்திப்பு கூட்டணியை உறுதி செய்யும் விதமாக அமைந்தது.

இதன் எதிரொலியாக உள்துறை அமைச்சர் அமித்ஷா வின் அழைப்பின் பேரில் தமிழக பா.ஜ.க. தலைவர் அண்ணாமலை இன்று காலை டெல்லிக்குப் புறப்பட்டுச் சென்றார். அவரது இந்த பயணத்தின் போது அ.தி.மு.க.வுடன் இணக்கமான போக்கை கடைப்பிடிக்கும்படி பா.ஜ.க. மேலிடம் அறிவுறுத்தும் என்று கூறப்படுகிறது.

கடந்த 2021 ஜூலை மாதம், தமிழக பா.ஜ.க. தலைவராக அண்ணாமலை நியமிக்கப்பட்டார். அப்போது இருந்தே ஆளும் திமுக அரசுக்கு எதிராக கடும் விமர்சனங்களை முன் வைத்து வரும் அண்ணாமலை, கூட்டணிகட்சியான அ.தி.மு.க.வுடனும் இணக்கமாக செல்ல விரும்பவில்லை என்றே கூறப்பட்டது.

கடந்த சட்டமன்ற தேர்தலில் பா.ஜ.க. உடன் கூட்டணி வைத்ததே அ.தி.மு.க. தோல்விக்கு காரணம் என அதிமுக மூத்த தலைவர்கள் சிலர் வெளிப்படையாக கூறினர். எனினும் அப்போது டெல்லி மேலிடம் அழைத்து இருதரப்பையும் சமாதானம் செய்தது.

தி.மு.க. தலைவர்களின் ஊழல் பட்டியலை வெளியிட்டு பேசிய அண்ணாமலை, தமிழ்நாட்டில் ஆட்சியில் இருந்த அனைத்து கட்சிகளின் வெளியிடுவேன் என்று கூறியதுடன் திராவிட கட்சிகள் ஊழலில் திளைக்கின்றன, முன்னாள் முதல்வர் ஜெயலலிதா அதன் காரணமாகவே நீதிமன்றத்தால் தண்டிக்கப்படார் என அண்ணாமலை பேசியது அ.தி.மு.க. தரப்பில் பெரும் கொந்தளிப்பை ஏற்படுத்தியது.

இரு ஆண்டுகளுக்கு முன்பு ஈரோடு கிழக்கு தேர் தலின் போது இ.பி.எஸ்.ஓ.பி.எஸ். இருதரப்பினரை இணைக்க அண்ணாமலை முயன்ற போது கட்சியின் உள்விவகாரத்தில் தலையிடுவதை அ.தி.மு.க. நிர்வாகிகள் விரும்பவில்லை.