ફરી વાર ગુજરાતમાં દાદાનું રાજ!

ગુજરાતમાં ભાજપની ડબલ એન્જિન સરકારના સુકાની મુખ્ય મંત્રી ભૂપેન્દ્ર પટેલ વિધાનસભા ચૂંટણીમાં જંગી મતે વિજયી બનીને બીજી વાર મુખ્ય મંત્રી બન્યા. ‘દાદા’ તરીકે ઓળખાતા સરળ અને મૃદુભાષી મુખ્ય મંત્રીના વ્યક્તિત્વનાં અજાણ્યાં પાસાંની ઓળખ મેળવીએ.

- મહેશ શાહ (અમદાવાદ)

૧૨ તારીખ ગુજરાતના મુખ્ય મંત્રી ભૂપેન્દ્ર પટેલ માટે શુકનવંતી સાબિત થઈ છે. ગયા વર્ષની બાર સપ્ટેમ્બરે એ ગુજરાતના સત્તરમા મુખ્ય મંત્રી તરીકે પસંદ થયા. આ વખતે બારમીએ (ડિસેમ્બર) એમણે મુખ્ય મંત્રી તરીકે શપથ લીધા.

આ સામ્યતા પણ જુઓ. અમદાવાદની ઘાટલોડિયા વિધાનસભામાંથી ચૂંટાયેલાં ભાજપનાં ધારાસભ્ય આનંદીબહેન પટેલ વર્ષ ૨૦૧૪માં ગુજરાતનાં પ્રથમ મહિલા મુખ્ય મંત્રી બન્યાં. એ પછી ૨૦૧૭ની વિધાનસભા ચૂંટણીમાં આનંદીબહેનના વિશ્વાસુ ભૂપેન્દ્ર પટેલ ઘાટલોડિયા બેઠક પરથી વિજયી થયા. જો કે ૨૦૨૧માં ૧૧ સપ્ટેમ્બરે તત્કાલીન મુખ્ય મંત્રી વિજય રૂપાણીએ રાજીનામું આપ્યું એના બીજા દિવસે એટલે કે ૧૨ સપ્ટેમ્બરે ૫૯ વર્ષી ભૂપેન્દ્ર પટેલની મુખ્ય મંત્રીપદે વરણી થઈ. આમ ઘાટલોડિયામાંથી ભાજપના બે ધારાસભ્ય મુખ્ય મંત્રી બન્યા.

‘ઔડા’ના કાર્યક્રમમાં અમિત શાહ સાથે - મેમનગર પાલિકાના સમારંભમાં. નગરસેવક તરીકે સામાન્ય શરૂઆતથી સીએમની ગાદી સુધી..

મહત્ત્વપૂર્ણ ગણો તો ભૂપેન્દ્ર પટેલ ૨૦૧૭ની વિધાનસભા ચૂંટણીમાં ૧.૧૭ લાખ અને આ વખતે ૨૦૨૨ની ચૂંટણીમાં ૧.૯૨ લાખ મતની સરસાઈથી જીત્યા. એ રીતે એમણે પોતાનો જ રેકૉર્ડ તોડ્યો છે. ખાસ નોંધવું પડશે કે આ વખતે વિધાનસભાના ચૂંટણીપ્રચારની એક સભામાં વડા પ્રધાન નરેન્દ્ર મોદીએ કહ્યુંઃ નરેન્દ્ર કરતાં ભૂપેન્દ્રનો રેકૉર્ડ જોરદાર હોવો જોઈએ!

બન્યું એમ જ. ગુજરાત વિધાનસભામાં ભાજપને (૧૮૨માંથી) સર્વાધિક ૧૫૬ બેઠકો મળી, એનાથી કોંગ્રેસના ભૂતપૂર્વ મુખ્ય મંત્રી (હવે સ્વર્ગીય) માધવસિંહ સોલંકીનો ૧૪૯ બેઠકો જીતવાનો રેકૉર્ડ તૂટ્યો.

ભૂપેન્દ્રભાઈ કડવા પાટીદાર સમાજના પહેલા મુખ્ય મંત્રી છે. અમદાવાદના દરિયાપુરમાં રહેતા ભાજપના કાર્યકર રાજેન્દ્ર પટેલે કહ્યા મુજબ, અમદાવાદમાં મોસાળ ધરાવતા પાટીદારો આઠિયા પટેલ કહેવાય. એ દૃષ્ટિએ ભૂપેન્દ્રભાઈ પટેલ આઠિયા પટેલ છે.