હવે ગુજરાતમાં આવે છે ‘સુપર-૪૦’

વિજય રૂપાણી: ‘આઈઆઈટી' જેવી શૈક્ષણિક સંસ્થા માટે ગુજરાતનાં બાળકોને તૈયાર કરવાં છે.

દિન-પ્રતિદિન શિક્ષણ મોંઘું થઈ રહ્યું છે. ગરીબ અને મધ્યમ વર્ગનાં બાળકો તેજસ્વી હોવા છતાં ઉચ્ચ અભ્યાસ અર્થે સારી ઈન્સ્ટિટ્યૂટમાં પ્રવેશ મેળવી શકતાં નથી. આવાં અઢળક ઉદાહરણ જોવા મળી રહ્યાં છે. એમાં પણ આ વર્ગનાં બાળકોનું આઈઆઈટીમાં પ્રવેશ લેવાનું સપનું હોય તો એ પૂરું કેમ કરવું? એના તો કોચિંગ ક્લાસની ફી જ વર્ષની ત્રણથી સાડા ત્રણ લાખ રૂપિયા જેટલી હોય છે!

આવી મૂંઝવણ અનેક પરિવારને સતાવતી હોય છે, પરંતુ હવે એવાં કુટુંબનાં બાળકોની મદદે રાજકોટની એક સેવાભાવી સંસ્થા આવી છે. રાજકોટના પૂજિત રૂપાણી મેમોરિયલ ટ્રસ્ટે ગરીબ વર્ગના તેજસ્વી વિદ્યાર્થીઓને નિઃશુલ્ક કોચિંગ આપી દેશની આઈઆઈટી અને એઈમ્સ જેવી ઉચ્ચ શિક્ષણ આપતી સંસ્થાઓમાં પ્રવેશ મેળવવામાં મદદ માટે બીડું ઝડપ્યું છે.