મેઘના ગિરીશ: માતૃપ્રેમનો અખૂટ દરિયો

બલિદાની પુત્રની યાદમાં બેંગલુરુનાં એક માતાએ રાષ્ટ્રભક્તિ તથા સૈનિક કલ્યાણનાં કાર્યો માટે ટ્રસ્ટ બનાવ્યું. જવાનોની વિધવા, એમનાં સંતાનો તથા વાલીઓને મળવાપાત્ર લાભ અપાવવા ઉપરાંત ભૂતપૂર્વ સૈનિકોને થાળે પાડવા, વિદ્યાર્થીઓને લશ્કરમાં જોડાવા પ્રોત્સાહિત કરવા જેવાં અનેક કાર્યો આ ટ્રસ્ટ કરે છે. ફોજી પરિવારમાંથી આવતાં આ મહિલાએ દેશરક્ષામાં એમનો પુત્ર અક્ષય તો ગુમાવ્યો, પણ સેવાકીય પ્રવૃત્તિ થકી એમણે દીકરાની યાદને અ-ક્ષય અર્થાત્ અવિનાશી બનાવીને માતૃપ્રેમનો એક અનોખો દાખલો બેસાડ્યો છે. ‘મધર્સ-ડે’ના અવસરે ‘પ્રિયદર્શિની વિશેષ’

- સમીર પાલેજા

જો અક્ષય, આપણા પરિવારમાં બહુ બધા ફોજી છે, આપણે ઘણી દેશસેવા કરી લીધી. તારામાં આવડત ને બુદ્ધિનો ઢગલો છે. જે ધારીશ એ બની શકીશ, પણ ફોજની જીદ મુકી દે.

અક્ષયે જીદ ન મૂકી. નૅશનલ ડિફેન્સ એકેડેમી (એનડીએ)ની લેખિત પરીક્ષા પાસ કરી. સર્વિસ સિલેક્શન બોર્ડ (એસએસબી)ના ઈન્ટરવ્યૂની રાહ જોતો હતો. એ દરમિયાન એન્જિનિયરિંગની પ્રવેશપરીક્ષા પણ ઉત્તીર્ણ કરી. મમ્મીએ ફરી ફોસલાવ્યો કે કૉલેજમાં સીટ તો લઈ લે, એસએસબીમાં પાસ ન થવાય તો એન્જિનિયરિંગ તો થઈ શકે.

એસએસબીમાં ૧૦૦ ટકા પાસ થઈશ..’  એમ કહીને અક્ષયે એન્જિનિયરિંગમાં પ્રવેશ ન લીધો. એસએસબી ક્લિયર કરીને નૅશનલ ડિફેન્સ એકેડેમી જોઈન કરી. પાસિંગ આઉટ પરેડમાં પુત્રને ફોજીના યુનિફૉર્મમાં જોઈને એના પિતા વિંગ કમાન્ડર ગિરીશ કુમાર તથા માતા મેઘના ગિરીશની છાતી ગજ ગજ ફૂલી ગઈ.

નવ વર્ષ બાદ ૨૯ નવેમ્બર, ૨૦૧૬નો એ ગોઝારો દિવસ..

જમ્મુ-કશ્મીરના નગરોટાના આર્ટિલરી યુનિટમાં ચાર સૈનિકોને માર્યા બાદ આતંકીઓએ બે રેસિડેન્શિયલ મકાનનો કબજો લીધેલો. મેજર અક્ષય ગિરીશને ક્વિક રિસ્પોન્સ ટીમની આગેવાની લેવાનો ઑર્ડર મળ્યો. આતંકીઓ એક પણ નિર્દોષનો જીવ ન લે એ હેતુ હતો. ઉંદર-બિલાડીના ખેલમાં અક્ષયની ટીમે કલાકો સુધી ત્રાસવાદીઓને વ્યસ્ત રાખ્યા. છેવટે આ મૂઠભેડમાં ત્રણ આતંકી માર્યા ગયા, પરંતુ મરણિયા થઈને એમણે ફેંકેલી ગ્રેનેડના વિસ્ફોટને કારણે મેજર અક્ષય પણ વીરગતિ પામ્યા.

પુત્રની શહીદીનાં છ વર્ષ પછી પણ મેઘના ગિરીશ ગળગળા સ્વરે પ્રિયદર્શિનીને કહે છે:

‘અક્ષય આઠમા ધોરણથી જ બેંગલુરુસ્થિત રાષ્ટ્રીય મિલિટરી સ્કૂલમાં ભણવા ચાલ્યો ગયો હતો  સૈનિક સ્કૂલમાં ઍડ્મિશન મેળવવું અઘરું હોય છે, પણ મારા દીકરાએ પ્રવેશપરીક્ષા સહેલાઈથી પાસ કરી હતી. એમ તો એનડીએમાં જોડાયા પછી મિલિટરીમાં નવ વર્ષની કરિયરમાં પણ એનો દરેક પરફોર્મન્સ આલ્ફા કે ઈન્સ્ટ્રક્ટર લેવલનો રહ્યો, જે ઘણો પ્રભાવશાળી કહેવાય. એનડીએમાં જ એણે ઈલેક્ટ્રોનિક એન્જિનિયરિંગની ડિગ્રી લીધી એટલે એની નિમણૂક એન્જિનિયરિંગ બ્રાન્ચમાં થયેલી, પણ દેશ માટે બલિદાન આપવાનો અવસર આવ્યો ત્યારે એ પાછો પડ્યો નહીં.’