અખાત્રીજથી અષાઢી બીજઃ બધું જ સમર્પિત ભગવાનના રથ માટે..

સૌથી લાંબા અંતરમાં ફરતી ભાવનગરની યાત્રા માટે છે અશ્વરથ. ભગવાનને ચડતાં વસ્ત્રો પણ અહીંની ખાસિયત છે.

આમ જુઓ તો આ રથયાત્રા ભાવનગરનો નગર ઉત્સવ છે. રથને તૈયાર કરવા, ભગવાનના વાધા-સાફા બનાવવા ઉપરાંત રસ્તા પર ધજાઓ લગાડવા સહિતનાં તમામ કામમાં સૌ સ્વયંભૂ જોડાઈ જાય છે તો રથયાત્રાના દિવસે વિનામૂલ્યે પ્રસાદ, નાસ્તો, ઠંડાં પીણાં, રસ્તામાં ઠેર ઠેર રંગોળીઓ, ઢોલ-નગારાંના સ્વાગત સાથે ભાવનગર કંઈક અનોખું બની જાય છે. આ જ આસ્થાનો ચમત્કાર છે. આ નગરયાત્રાનો રથ ત્રણ મહિના સુધી દોડે છે આસ્થા અને શ્રદ્ધાનાં પૈડાં પર.

અષાઢી બીજે ઓડિશાના જગન્નાથપુરીમાં યોજાતી ભગવાન જગન્નાથ, સુભદ્રા અને બલભદ્રજીની રથયાત્રા આસ્થાનાં પૈડાં પર ગુજરાતમાં પણ દસકાઓ પૂર્વે આવી હતી. દેશની ત્રીજા નંબરની અને ગુજરાતમાં બીજા નંબરની સૌથી મોટી ભાવનગરની રથયાત્રા આ વર્ષે ૩૮મું પર્વ ઊજવશે.

પુરીના જગન્નાથ મંદિરમાં ફક્ત હિંદુઓ કે સનાતન ધર્મીઓ જ પ્રવેશી શકે છે. જો કે ભગવાન જગન્નાથ તો જગતના નાથ હોવાથી એ પોતાના ભક્તોમાં ધર્મના ભેદભાવ કરતા નથી. એટલે જ દર અષાઢી બીજે ભગવાન સ્વયં નિજ મંદિરમાંથી નીકળીને ભાવિકોને મળવા રથમાં બેસીને નગરયાત્રાએ નીકળે છે.