‘കുട്ടിയമ്മ’ക്ക് ഇത് ഹാപ്പി ക്രിസ്മസ്

പതിറ്റാണ്ടുകളായി നാടകവേദികളിലുണ്ട് പൗളി വത്സൻ. സിനിമയിലെ ചെറിയ വേഷങ്ങളിലൂടെ കൂടുതൽ പരിചിതമായി ഇന്ന് മലയാളികൾക്ക് അവരുടെ മുഖം. അടുത്തിടെ ഇറങ്ങിയ അപ്പൻ സിനിമയിലെ കുട്ടിയമ്മ കഥാപാത്രം ആരുടെ മനസ്സിൽനിന്നും മായില്ല...

- ഹസീന ഇബ്രാഹിം

ചെമ്മീൻ കെട്ടുകൾക്ക് ഇടയിലൂടെ നീണ്ട് പുളഞ്ഞു കിടക്കുന്ന റോഡ്. കാറ്റിൽ കടലിന്റെ ഉപ്പുരസം. വൈപ്പിൻകരയിലെ പാതയോരങ്ങളിൽ ഫുട്ബാൾ കമ്പവും ക്രിസ്മസ് വരവും ഫ്ലക്സുകളായും നക്ഷത്രങ്ങളായും നിറഞ്ഞിട്ടുണ്ട്. വളപ്പിൽനിന്ന് ഉൾറോഡിലേക്ക് കുറച്ചധികം ചെന്നപ്പോഴേക്കും ആ അമ്മച്ചി തന്റെ കുഞ്ഞുവീട്ടിൽ കാത്തുനിന്നിരുന്നു. 'അപ്പൻ' ചിത്രത്തിൽ ആരുടെയും കണ്ണ് നിറയിക്കുന്ന അമ്മച്ചിയായി വേഷമിട്ട പൗളി വത്സന് ഇപ്പോൾ മുഖം നിറഞ്ഞ ചിരിയുണ്ട്. നാടകങ്ങളിലും സിനിമകളിലും അവർ കാലുറപ്പിച്ചിട്ട് പതിറ്റാണ്ടുകളായി. ഈ ക്രിസ്മസ് പൗളിക്ക് വിശേഷപ്പെട്ടതാണ്. ആഘോഷിക്കാൻ കഴിയാതെപോയ ഒട്ടേറെ ക്രിസ്മസുകളുടെ കഥ പറഞ്ഞുതന്നെ അവർ തുടങ്ങി...

എന്തൊക്കെയാണ് ക്രിസ്മസിൻറ ആഘോഷങ്ങൾ?

രണ്ടുമൂന്നു വർഷമായി ക്രിസ്മസ് ആഘോഷം ഒന്നുമില്ല. ഭർത്താവ് വത്സൻ മരിച്ചിട്ട് ഒന്നരക്കൊല്ലമായി. ഇപ്രാവശ്യം ആഘോഷിക്കണം. എന്റേത് പ്രണയവിവാഹമായിരുന്നു. അതുകൊണ്ട് രണ്ടു മതത്തിന്റെ ആഘോഷങ്ങളും ഞങ്ങൾക്കുണ്ട്. മുമ്പ് ക്രിസ്മസിന് എവിടെയാണെങ്കിലും രാത്രിക്ക് രാത്രി വീട്ടിലെത്തും. ക്രിസ്തുമസ് കാലം അന്നൊക്കെ നാടകസീസണാണ്. ദിവസം നാലു നാടകങ്ങൾ വരെ ഉണ്ടാകും.

എന്റെ വീട്ടിൽ അപ്പച്ചനും അമ്മച്ചിയും അപ്പച്ചന്റെ അമ്മയും പിന്നെ ഞങ്ങൾ ഏഴു മക്കളുമായിരുന്നു. അഞ്ചു പെണ്ണും രണ്ടാണും. അപ്പച്ച ൻ ചവിട്ടുനാടകം ചെയ്തിട്ടുണ്ട്. അനുജൻമാരും നാടകം അഭിനയിച്ചിരുന്നു. കുടുംബത്തിൽ എല്ലാവരും കലാസാദകർതന്നെ. പ്രണയവിവാഹമായതിനാൽ അപ്പച്ചൻ കുറെനാൾ വീട്ടിൽ കയറ്റിയില്ല. അഞ്ചുവർഷം ഞങ്ങൾ പ്രണയിച്ചത് ആരും അറിഞ്ഞിരുന്നില്ല. കല്യാണം കഴിഞ്ഞ് കുറെ കഷ്ടപ്പാടുകളുമുണ്ടായി. ആത്മഹത്യശ്രമം വരെ നടത്തിയിട്ടുണ്ട്.

എങ്ങനെയാണ് അഭിനയരംഗത്തേക്ക്?

ചെറുപ്പം തൊട്ടേ നാടകം കണ്ടിരുന്നു. എല്ലാ കലാപരിപാടിക്കും അപ്പച്ചൻ കൊണ്ടുപോകും. കോൺവെന്റിൽ പഠിച്ചിരുന്ന കാലത്തുതന്നെ ചെറിയ വേഷങ്ങൾ ചെയ്തിട്ടുണ്ട്. കൂടുതലും ആൺപിള്ളേരുടെ വേഷമാണ് ചെയ്തത്. ഏഴാം ക്ലാസായപ്പോൾ ടീച്ചർമാർ പെൺവേഷം തരാൻ തുടങ്ങി. സ്ഥിരമായി ആണുങ്ങൾ മത്സരിച്ചു ജയിച്ചിടത്ത് ഞാൻ നാടകം ചെയ്ത് സമ്മാനങ്ങൾ വാരിക്കൂട്ടി.