സീരിയസാണ് സിനിമ

മിമിക്രി- ചാനൽ റിയാലിറ്റി ഷോയിലെ തകർപ്പൻ പെർഫോമൻസിലൂടെ വെള്ളിത്തിരയിലെത്തിയ താരമാണ് സുമേഷ് ചന്ദ്രൻ. ദൃശ്യം 2ലെ സാബു എന്ന കഥാപാത്രം ഏറെ കൈയടി നേടിയിരുന്നു. ജൂനിയർ ആർട്ടിസ്റ്റിൽ തുടങ്ങി നായകനിലേക്കുള്ള സുമേഷിന്റെ വരവും ദൃശ്യത്തിലെ പോലെ ട്വിസ്റ്റുകൾ നിറഞ്ഞതാണ്...

- സുബൈർ പി. ഖാദർ

പ്രേക്ഷകർക്ക് മനഃപാഠമായ കഥാപരിസരങ്ങളെയും കഥയെയും വീണ്ടുമൊരു സസ്പെൻസിന്റെ നൂലിലേക്ക് കോർത്തു വെച്ച ചിത്രമായിരുന്നു ദൃശ്യം 2. ട്വിസ്റ്റുകൾ നിറച്ചുവച്ച സിനിമയിൽ പ്രേക്ഷകർ കൈയടിച്ച കഥാപാത്രങ്ങളിൽ ഒരാളായിരുന്നു സാബു എന്ന ‘കുടിയനായ പൊലീസുകാരന്റേത്. സ്റ്റേജ് -ചാനൽ ഷോയിലൂടെ ശ്രദ്ധേയനായ സുമേഷ് ചന്ദ്രനായിരുന്നു സാബുവായി വേഷമിട്ടത്. മിമിക്രിയിലൂടെ കലാരംഗത്തേക്ക് ചുവടുവെച്ച സുമേഷിന്റെ ജീവിതവും ട്വിസ്റ്റുകൾ നിറഞ്ഞതാണ്. ജൂനിയർ ആർട്ടിസ്റ്റിൽ തുടങ്ങി നായകനിൽ വരെ എത്തിയ വഴികളും കുടുംബ വിശേഷങ്ങളും അദ്ദേഹം പങ്കുവെക്കുന്നു.

ദൃശ്യം 2ലേക്ക്

 ഒരു ചാനൽ കോമഡി ഷോയുടെ റിഹേഴ്സലിനിടെയാണ് ജീത്തു ജോസഫിന്റെ ഫോൺ കാൾ വന്നത്. ഞെട്ടലും വെപ്രാളവുമായിരുന്നു ആദ്യം. മടക്കിക്കുത്തിയ മുണ്ടൊക്കെ അറിയാതെ അഴിച്ചിട്ടു. സുഖാന്വേഷണത്തിനൊടുവിൽ എന്റെ ഫോട്ടോ അദ്ദേഹം ആവശ്യപ്പെട്ടപ്പോൾ എന്തിനെന്നു പോലും ചോദിച്ചില്ല. ഒരു കള്ളുകുടിയന്റെ റോൾ ഉണ്ടെന്നായിരുന്നു ആദ്യം പറഞ്ഞത്.

കോമഡി റോൾ ആയിരിക്കുമെന്ന് കരുതിയെങ്കിലും സീരിയസ് കഥാപാത്രമാണെന്ന് അറിഞ്ഞപ്പോൾ ഞെട്ടി. ലോക്ഡൗണിനിടെ എന്റെ ചാനൽ കോമഡി ഷോകളെല്ലാം അദ്ദേഹം കണ്ടിരുന്നു. ലാലേട്ടന്റെ കട്ടഫാനാണ്. അദ്ദേഹത്തിനൊപ്പം അഭിനയിക്കാൻ കഴിഞ്ഞത് വലിയ ഭാഗ്യമാണ്.

സ്കൂളിലെ സകലകലാ വല്ലഭൻ