ഭ്രാന്തൻ നായ് കടിച്ച പശു...

ഭ്രാന്തൻ നായ് കടിച്ച പശുവിന് ചികിത്സ തേടി ഒരു കർഷക സ്ത്രീ വെറ്ററിനറി സെന്ററിലേക്ക് വന്നതിനെ തുടർന്നുണ്ടായ രസകരമായ സംഭവങ്ങൾ ഓർത്തെടുക്കുകയാണ് ലേഖകൻ...

ഭ്രാന്തൻ നായ് കടിച്ച പശുവിന്റെ പാൽ ചായയിലൊഴിച്ച് കുടിച്ചതിനാൽ ഞങ്ങളും കുത്തിവെപ്പെടുക്കണമോ എന്ന് ഭയത്തോടെ അവർ ചോദിച്ചു. ഭ്രാന്തൻ നായ് കടിച്ച പശു അവരിൽ ഭീതിയുടെ കാർമേഘം പടർത്തിയിരുന്നു.

1957 കാലം. കൂത്തുപറമ്പിൽ പുതുതായി ആരംഭിച്ച വെറ്ററിനറി സെന്ററിലേക്ക് സ്ഥലംമാറ്റം. അതിനുമുമ്പ് മംഗലാപുരത്തും കാസർകോട്ടുമായിരുന്നു ജോലി. മദ്രാസ് സ്റ്റേറ്റ് മൃഗ സംരക്ഷണ വകുപ്പിന് കീഴിലായിരുന്നു ജോലി.

ഒരു ദിവസം കർഷകസ്ത്രീ അവരുടെ പശുവിനെ ഭ്രാന്തൻ നായ് കടിച്ച വിവരം വന്നുപറഞ്ഞു. വീട് കൂത്തുപറമ്പിൽ നിന്ന് ആറു കിലോമീറ്റർ അകലെയാണ്. വാഹന സൗകര്യം ഇല്ല. 14 ദിവസം തുടർച്ചയായി പശുവിനെ കുത്തിവെക്കേണ്ടിയിരുന്നതിനാൽ അടുത്തെവിടെയെങ്കിലും എത്തിക്കണമെന്ന് അവരോട് പറഞ്ഞു. അവർ സമീപത്തെ പല വീടുകളിലും പശുവിനെ കെട്ടാൻ സഹായം ചോദിച്ചെങ്കിലും ഭ്രാന്തൻ നായ് കടിച്ച പശുവിനെ ആരും അടുപ്പിച്ചില്ല.