சங்கப் புதையலை அள்ளித் தரும் யுகபாரதி!

பாடலாசிரியர் யுகபாரதியின் மேல்கணக்கு நூல், நம் காலத்தில் தமிழராகிய நமக்குக் கிடைத்த இலக்கிய விடிவெள்ளி.

சங்கப் பாடலுக்கு உரையாசிரியர்கள் பலரும் சரியாக உரை எழுதாததால் நான் மேல்கணக்கு எழுதியுள்ளேன் என்கிறார். இவரின் நூல் சங்க காலத்தைப் பற்றிய சமகால வாசிப்பு.

தமிழ்ச் சமூகத்தின் பத்தாயிரமாண்டுப் பண்பாட்டு உருவாக்கத்தின் பெருமிதமான தன் வெளிப்பாடு அய் நூறுக்கும் மேற்பட்ட புலவர்களின் இமாலயப் பாக்கள். பலராலும் கவனிக்கப்படாத சங்கப் புதையலின் சத்தான பக்கங்களை உருவியெடுத்து நம் மீது பூக்களாய்த் தெளிக்கிறார் யுகபாரதி.

போர் அரசியலுக்கு இலக்கியத் தீர்வு அமைதி

போர்க்காலச் சூழலிலும் போருக்கெதிரான கருத்துக்களைப் பதிவு செய்த இலக்கியம் நம் காலத்திலும் தேவை. அறமும் ஈரமும் சாரமும் இயற்கையும் நமது இலக்கியச் சொத்து. மனிதநலச் சிந்தனைகளையும் சமகால நெருக்கடிகளுக்கான தீர்வுகளையும் ஏந்தி நிற்கும் மாந்த இலக்கியம். எண்ணற்ற மனிதர்களின் வாழ்வியல் நெருக்கடிகளின் போராட்டங்களின் பதிவு.

அகழாய்வில் புதிய புதிய உண்மைகள் வெளிச்சத் திற்கு வருவதைப் போன்றே இலக்கிய ஆய்விலும் புதுப் புதுப் பொருள்கள் காலத்தின்

தேவைக்கேற்ப தோன்றுகின்றன. தனியொரு மனிதனின் வாழ்வியலையோ நாட்டின் வரலாற்றையோ வெளிப்படுத்துவது பேரிலக்கியம் என்ற வரையறை, சங்க இலக்கியம் முன்னிறுத்தும் வாழ்வியலைப் புரிந்துகொள்ளப் போதுமான தாக இல்லை.

பேரிலக்கிய வரையறைகளை நெகிழ்த்தாமல் வானம் வரை சிறகு விரிக்கும் புறநானூற்றுப் புலவர்க்கு நாம் நியாயம் வழங்க முடியாது. பண்பாட்டு மரபு காத்திட எட்டுத் திக்கும் பயணிக்கும் அவர்களை எண்கோணங்களிலும் கவிஞர் ஆய்ந்துள்ளார். சமகால அரசியல் திறனாய்வையும் ஒப்பீடாகத் தருகிறார். நூலுக்குத் தனிப்பெருமை சேர்ப்பதாக இந்த அணுகுமுறை அமைகிறது.

சங்க இலக்கியம் காட்டும் மனிதன் கடவுளுக்கும் மன்னருக்கும் அடிபணிய மறுப்பவன். மனிதனுக்கு மனிதன் உற்ற துணை என்று உறவாடுபவன். சாதியும் வர்க்கமும் பாலின வேற்றுமைகளும் இல்லா மானுடன். உண்பது நாழி உடுப்பது இரண்டே மன்னன் உயிர்த்தே மலர்த்தலை உலகம் எனினும் மக்களைக் காப்பதே மன்னனுக்குச் சிறப்பு.