હવે ઇનડોર ગેમ પણ મોબાઇલની સ્ક્રીનમાં અટવાઈ

વૅકેશનનો સમય એટલે બાળકો માટે ફુલ મસ્તીનો સમય. પહેલાંના સમયમાં બાળકો વૅકેશન પડે એટલે અનેક આઉટડોર ગેમ રમતાં, પરંતુ હવે તો તે રમતો વિસરાઈ ગઈ છે. છતાં પણ ઇનડૉર ગેમ તો વૅકેશનનું હાર્દ હતી, પરંતુ હવે ઇનડૉર ગેમ પર પણ મોબાઇલે શાસન જમાવી દીધું છે. પરિવાર, બાળકો સાથે મળીને જે રમતો ઘરમાં રમતાં હતાં હવે તે મોબાઇલમાં રમાવા લાગી છે. હવે તો ઇનડૉર ગેમ પણ આંગળીના ટેરવે ઓનલાઇન રમાય છે.

- હેતલ રાવ

આરવ આઠમા ધોરણમાં અભ્યાસ કરતો તેજસ્વી વિદ્યાર્થી છે. ભણવામાં હોશિયાર છે, પરંતુ છેલ્લાં બે વર્ષથી તેનો સ્કોર સતત ઓછો થતો જાય છે. એટલે કે અભ્યાસમાં તેની ટકાવારીમાં ઘટાડો થયો છે. તેનું કારણ છે મોબાઇલ. જી હા, એક સમય હતો જ્યારે આરવ મોબાઇલથી કોસો દૂર રહેતો, પરંતુ કોરોના સમયમાં ઓનલાઇન અભ્યાસ કરવાનો આવ્યો ત્યારથી આરવ અને મોબાઇલ એકબીજાના ખાસ મિત્રો બની ગયા છે. ત્યાં સુધી કે હવે તે પોતાના ખાસ મિત્રો સાથે પણ વાતચીત ઓછી કરે છે. એટલું જ નહીં, વૅકેશનમાં પણ બહાર રમવા જવાનું ટાળે છે. કોઈને ત્યાં જાય તો પણ તેના હાથમાં મોબાઇલ તો હોય જ. છતાં પણ જ્યારે તેનાં ઝિન ભાઈ-બહેન ઘરે આવે તો સાથે મળીને ક્યારેક કૅરમ તો ક્યારેક લૂડો તો ક્યારેક સાપસીડી રમતાં. આ ઉપરાંત પણ અનેક એવી રમતો હતી જે તે પોતાનાં ભાઈબહેન સાથે ઘરમાં રમતો. તે સમયે તેનો મોબાઇલ ક્યાં છે, કોની પાસે છે તેની પણ તેને દરકાર રહેતી નહીં, પરંતુ હવે એવું નથી, હવે તો આરવ જ નહીં, પણ તેનાં ભાઈબહેનો પણ વૅકેશનમાં સાથે મળે તો આઉટડૉર ગેમ લાઇવ રમવાની જગ્યાએ પોતપોતાના મોબાઇલ પર જ રમવાનું પસંદ કરે છે. ઘરના દરેક ખૂણામાં એક-એક બાળક પોતપોતાના મોબાઇલ લઈને ગેમની દુનિયામાં મસ્ત બની જાય છે. મોબાઇલની અંદર જ સાપસીડી, લૂડો કિંગ, કૅરમ, અમદાવાદની બાઝી, નવો વેપાર, ઓએક્સ, ચેસ, કાર્ડ જેવી અનેક રમતો રમે છે. આરવનાં માતા-પિતા તેને ઘણીવાર કહે છે કે, દીકરા, આમ મોબાઇલમાં રમવાની જગ્યાએ બહાર જઈને મિત્રો સાથે મળીને રમશો તો વધુ મજા આવશે. અરે, બહાર ન જવું હોય તો ઘરમાં જ ઇનડૉર ગેમ રમો. આ શું આખો દિવસ મોબાઇલ પર જ રમ્યા કરો છો.. ત્યારે આરવ ચીડાઈને કહેતો કે, ‘તમને ખબર ન પડે, મોબાઇલ પર રમવાની મજા છે તે બીજે ક્યાંય નહીં અને અહીં રમવા માટે કોઈની જરૂર પણ નથી, તમે જાતે જ કોમ્પ્યુટર સાથે રમી શકો છો.' જે આરવ માતા-પિતાની એક પણ વાત નકારતો નહીં, તે આ મોબાઇલની મહેરબાનીથી માતાપિતાની સામે બોલતો થઈ ગયો છે. એટલું જ નહીં, પોતાની સમગ્ર દુનિયા તે મોબાઇલને જ માને છે. તેના માટે વૅકેશન એટલે રોકટોક કર્યા વગર વહેલી સવારથી મોડીરાત સુધી મોબાઇલના વિશ્વમાં મજા કરવી તે છે.

આ માત્ર આરવની જ વાત નથી, આજકાલ દર બીજા બાળકની સ્થિતિ આરવ જેવી જ છે. જેમની માટે ઇનડૉર ગેમ એટલે મોબાઇલ અને મિત્ર એટલે મોબાઇલમાં સાથે રમતું કોમ્પ્યુટર.