‘આમ્રપાલી' ફિલ્મની પડદા પાછળની વાતો

‘આમ્રપાલી’ ફિલ્મ વિશેષરૂપથી ચર્ચામાં રહેવાનું કારણ આ ફિલ્મમાં બતાવવામાં આવેલાં યુદ્ધ દશ્યો છે, જે અદ્દલ યુદ્ધભૂમિ જેવાં જ દેખાતાં હતાં. તેનું શૂટિંગ સહારનપુરમાં થયું હતું. ત્યાં યુદ્ધ માટે હાથી-ઘોડા વગેરેની વ્યવસ્થા કરવી સરળ હતી. અહીંની યુદ્ધભૂમિ પર અસલી સૈનિકોએ યુદ્ધ કર્યું હતું

લેખ ટંડનના દિગ્દર્શનમાં બનેલી ‘આમ્રપાલી’ ફિલ્મ જ્યારે રિલીઝ થઈ એ સમયે તે ચર્ચાનો વિષ્ય બની હતી. રાહુલ સાંસ્કૃત્યાયન બૌદ્ધ ધર્મના ઊંડા અભ્યાસુ રહી ચૂક્યા છે. લેખ ટંડને તેમનું સિંહ સેનાપતિ નામનું પુસ્તક વાંચ્યું. ત્યાર બાદ આચાર્ય ચતુરસેનનું પુસ્તક ‘વૈશાલી કી નગરવધૂ’ વાંચ્યું ત્યારે આમ્રપાલી ફિલ્મ બનાવવાનો નિર્ણય લીધો. શરૂઆતમાં આ ફિલ્મમાં ધર્મેન્દ્રને લેવાનો વિચાર હતો અને સાથે સુનિલ દત્તના નામનો વિચાર પણ કરવામાં આવ્યો, પણ ફિલ્મના ડાયલોગમાં પંજાબી ભાષાના ઉચ્ચારણની છાંટ જોવા ન મળે તે માટે થઈને ધર્મેન્દ્રના સ્થાને સુનિલ દત્તને ફિલ્મમાં લેવામાં આવ્યા. સુનિલ દત્તના નામ માટે વૈજયંતી માલાએ પણ સહમતી આપી. અભિનેતા સુનિલ દત્ત અને અભિનેત્રી વૈજયંતી માલાએ પોતાના અભિનયથી આ ફિલ્મમાં અજાતશત્રુ અને આમ્રપાલીના પાત્રને જીવંત કર્યાં. આર્ટ ડાયરેક્ટર એમ.આર. આચરેકર અને કૉસ્ચ્યુમ ડિઝાઇનર ભાનુ અથૈયાએ વૈશાલીનગરીને આબેહૂબ બનાવવામાં ઘણી મહેનત કરી હતી. ફિલ્મ પુરી થયા બાદ લેખ ટંડન પહેલાં પ્રિન્સ ઑફ વેલ્સ મ્યુઝિયમના સંચાલકને મળ્યા હતા, પણ તેમને સંચાલક પાસેથી સંતોષકારક જવાબ ન મળ્યો. ત્યાર બાદ તેઓ પટણા વિશ્વવિદ્યાલયના પ્રોફેસર બુદ્ધકાલીન સાહિત્યના ઊંડા અભ્યાસુ યોગેશ મિશ્રાને મળ્યા. એ સમયે તેમણે લેખ ટંડનને કહ્યું હતું, ‘વૈશાલીનગરી આબેહૂબ એવી જ હતી, જેવી તમે ફિલ્મમાં દેખાડી છે.’