બોલિવૂડથી જન્મેલી ફેશનની ત્રણ મેડમ

ફિલ્મ ના જોતા હોય તેના પર પણ ફિલ્મ ઇન્ડસ્ટ્રીની અસર છે ઘણાં ફૅશનેબલને મારું જીવન એ મારી ફિલ્મ છે એવી ખબર છે

- ગૌરાંગ અમીન

ફૅશન શબ્દના મળમાં ફેસ અર્થાત મુખ ’ને ફેક્શન એટલે કે લોકોનો અમુક ભાગ શબ્દો એમ બે વણાયેલા છે. સમાજમાં મનુષ્યના અમુક વ્યક્તિત્વનો અન્ય મનુષ્યને બહારથી દેખાતો ચહેરો કેવો હોય તે અમુક અંશે ફેશન નક્કી કરી શકે છે. એક તરફ બીજાનું જોઈને કોઈ કશું કરે તો તેને વાંદરા જેવો નકલચી ગણવામાં આવે છે. તેવા જાતકને નબળો કે નકામો જાહેર કરવામાં આવે છે. બીજી તરફ બીજાનું જોઈને અપનાવવામાં આવતા તેમ જ બીજાને પોતાના જેવા પહેરાવવામાં આવતા માસ્ક એવમ કવરને ફેશનનો ખિતાબ આપી તેને સ્ટેટસ, સેન્સ 'ને સ્ટ્રેન્થ સાથે જોડવામાં આવે છે. માનવી અત્યંત અસામાન્ય પ્રાણી છે. એમાં ભારતીય માનવી અમુક રીતે વિશેષ છે. સ્વાભાવિક છે ભારતની ફેશન અતિવિશેષ રહેવાની. અંતરાલ સિંધુ સંસ્કૃતિના મર્યાદિત અવશેષોના પડઘા પાડતો હોય કે આઝાદ થયેલા ભારતનાં નાનાં નગરોના યુવા વર્ગને જીવંત જોતો હોય, વી ધ પીપલ ઓફ ઈન્ડિયા જેને કહેવાય એ લોકોના અમુક ભાગના માણસો જ્યારે વર્ચ્યુઅલી કે રિયલી ફેસ ટુ ફેસ થાય છે ત્યારે જાણતા કે અજાણતા અવારનવાર ફેશન વડે એકતા તેમ જ વિવિધતા પામે છે.

આધુનિક વિજ્ઞાન ૧૭મી સદીમાં જન્મ્યું, પણ આપણે ત્યાં પરિવર્તન સંસારનો નિયમ છે એવું ઈસુના જન્મનાં હજારો વર્ષ અગાઉથી લોકો જાણે છે. ચેન્જ 'ને ફેશન વચ્ચે અદ્ભુત સંબંધ છે. બદલાવ ના હોય તો નવી ફેશન ના આવે 'ને નિરંતર રૂપાંતરણ થયા જ કરે તો તાજી જન્મેલી ફેશન બાળપણમાં મૃત્યુ પામે. ભારતીય ઉપખંડમાં પ્રાચીન કાળથી સંન્યાસ લઈ સાધના કરનારા લોકોમાં જે દિગંબર રહેતા નહોતા તેઓ જે પહેરવેશ ધારણ કરતા તેમાં બુદ્ધ આવ્યા પછી ટ્વિસ્ટ આવ્યો 'ને કાષાય વસ્ત્ર આવ્યા. મૂળે ચોક્કસ પ્રકારની માટી વડે સફેદ યા રંગહીન કાપડને રંગી ગેરુઆ એવમ ભગવા રંગના બનાવી ખપમાં લેતા. સંસ્કૃતમાં કાષાય શબ્દ લાલાશ પડતો કથ્થાઈ રંગ સૂચવે છે. સાધુઓ માટે ફેશન શબ્દ વાપરવો ટેનિકલી જુઠ્ઠું બોલવા બરાબર છે. ફેશનેબલ એપરલ્સ ને યુનિફોર્મ ક્લોધિંગ વચ્ચે અંતર છે. ફેશન સંસારી મામલો છે, રાજસિક બાબત છે.