કવર સ્ટોરી

કેજરીવાલની ધરપકડ ભ્રષ્ટાચાર સામે લડાઈ કે નર્યું રાજકારણ?

- સુધીર એસ. રાવલ

હા, આ જ ન્યૂ ઇન્ડિયા છે, જ્યાં એવા કાયદાઓ બની રહ્યા છે, જેમાં વૉરન્ટ વગર સરકાર કોઈની પણ ધરપકડ કરી શકે છે, કારણ બતાવ્યા વગર સમન્સ મોકલી શકે છે, વ્યક્તિ ભલે સામાન્ય હોય કે કરોડોની સંખ્યામાં લોકોનો વિશ્વાસ ધરાવતી હોય, ભલે પછી તે લોકશાહી (!) દેશના અને જનતાએ ચૂંટેલા એક રાજ્યના મુખ્યમંત્રી કેમ ન હોય?! એન્ફોર્સમેન્ટ ડિરેક્ટોરેટ દ્વારા રાતોરાત દિલ્હીના મુખ્યમંત્રી અરવિંદ કેજરીવાલની ધરપકડ એ આઝાદ ભારતના ઇતિહાસમાં આવી પ્રથમ ઘટના છે. આ પહેલાં ઝારખંડના મુખ્યમંત્રી હેમંત સોરેનની પણ એન્ફોર્સમૅન્ટ ડિરેક્ટોરેટ દ્વારા ધરપકડ થઈ, પરંતુ તેમણે ધરપકડ પહેલાં રાજીનામું આપી દીધું હતું, પરંતુ કેજરીવાલ સાવ જુદી માટીના બનેલા રાજકારણી છે. તેમણે કેન્દ્રીય સત્તા સામે ઝૂક્યા વગર રાજ્યની જનતાએ આપેલા જનાદેશને પ્રાધાન્ય આપતા જેલમાંથી રાજ કરવાની વાત પકડી રાખી છે. આવું કરવા પાછળ તેમની પાસે પણ કાયદાઓનું જ પીઠબળ છે અને હવે સામસામે થનારી કાયદાઓની ટક્કરમાં કઈ અદાલત ક્યારે અને કેવો ન્યાય કરશે, તેના પર દેશના નાગરિકોની નજર મંડાઈ છે. લોકસભાની ચૂંટણીની જાહેરાત થઈ ચૂકી છે અને આદર્શ આચારસંહિતા લાગુ છે, ત્યારે એક રાષ્ટ્રીય કક્ષાના રાજકીય પક્ષના મુખ્ય નેતાને જેલમાં ધકેલી દેવા બાબતે ચૂંટણી પંચ સામે પણ નિષ્પક્ષ અને મુક્ત ચૂંટણી માટે સવાલો થશે અને બંધારણે તેને આપેલી સત્તાના નિર્ભીક ઉપયોગ સબબ કસોટી થશે, એ એક અલગ વિષય છે. રાજકીય રીતે જોઈએ તો સમગ્ર દેશમાં ખળભળાટ મચાવી દે તેવા ઇલેક્ટોરલ બોન્ડના મુદ્દાની ચર્ચા પાછળ ધકેલાઈ ગઈ છે જે કદાચ યોજનાબદ્ધ હોઈ શકે, પરંતુ દેશના સદ્નસીબે કેજરીવાલની ધરપકડ થયા પહેલાં જ સર્વોચ્ચ અદાલતનો ભલે મોડો, પરંતુ ઉદાહરણ સ્વરૂપ નિર્ભીક અને નિષ્પક્ષ ચુકાદો આવી જવાના કારણે ઇલેક્ટોરલ બોન્ડની વિગતો પણ એક તરફ ધડાધડ બહાર આવી રહી છે, જેમાંથી કાયદાના નામે થતાં રાજકારણની વિગતો પણ બહાર આવશે, તેવી શક્યતાઓ વધુ ઊજળી બની છે.

મની લોન્ડરિંગનો કાયદો કેમ વિવાદાસ્પદ?