વિઝા વિમર્શ

શું કરી શકો છો? શું ન કરવું જોઈએ?

- ડો.સુધીર શાહ

ભારત આવવાનો ટૂંકો રસ્તો ખોજવા નીકળેલા સ્પેનના ક્રિસ્ટોફર કોલંબસે અનાયાસે જ એક નવા દેશની ખોજ કરી. પાછળથી ઈ.સ. ૧૪૯૨માં કોલંબસે ખોજેલો એ દેશ અમેરિકા તરીકે ઓળખાયો.

અફાટ ખનિજ સંપત્તિ, ખેતીવાડી માટે માપી મપાય નહીં, એટલી પુષ્કર જમીન ધરાવતાં એ દેશે વિશ્વના બધા જ દેશોના લોકોને પોતાની તરફ આકર્ષ્યા. જેમ-જેમ એ દેશે પ્રગતિ કરી તેમ-તેમ વિશ્વના લોકો ‘અમેરિકન સપનું’ સેવવા લાગ્યાં. પરદેશીઓનો અમેરિકા પ્રત્યેનો ધસારો એટલો બધો વધી ગયો કે ત્યાં શરૂઆતમાં જઈને વસેલા યુરોપિયનો અને અંગ્રેજોને એવું લાગ્યું કે, જો તેઓ હવે આ માનવ પ્રવાહને અટકાવશે નહીં તો ગમે તેવા લોકો અહીં પ્રવેશશે. ચોર, લૂંટારા, ખૂનીઓ, રોગિષ્ઠો, વેશ્યાઓ આવા-આવા અનિચ્છનીય તત્ત્વ ધરાવતાં લોકો અહીં આવી જશે. આથી એમને ખાળવા અને ચાળવા માટે એક પછી એક કાયદાઓ ઘડવા માંડ્યા. આખરે વર્ષ ૧૯૫૨માં એમણે ધ ઇમિગ્રેશન એન્ડ નેશનાલિટી ઍક્ટ’ ઘડ્યો. એની હેઠળ એમણે અમેરિકામાં આવતા પરદેશીઓનું નિયંત્રણ દાખલ કર્યું.

ધ ઇમિગ્રેશન એન્ડ નેશનાલિટી ઍક્ટ, ૧૯૫૨ના ઘડવૈયાઓએ દીર્ઘદૃષ્ટિ વાપરી હતી. અમેરિકામાં ટૂંક સમય માટે યા કાયમ માટે આવેલપરદેશીઓને જો કોઈ મુશ્કેલી આવી પડે તો એમાંથી માર્ગ કાઢતા ઉપાયો આ કાયદામાં મૂકવામાં આવ્યા. ટૂંક સમય માટે યા કાયમ રહેવા માટે જે પરદેશીઓ આવે એમને શું શું ન કરવું જોઈએ એ પણ આ કાયદામાં ઘડવામાં આવ્યું.