હિડન કોસ્ટ - આ બધાનો ફોડ પાડી લેજો

શરૂઆતમાં તેઓ ખૂબ જ ઓછી ફી જણાવે છે. પછીથી ઝીણી-ઝીણી બાબત માટે તમારી આગળથી પૈસા ઉઘરાવે છે. આ કારણસર તમે જ્યારે કોઈ પણ એટર્ની, ભારતીય કે અમેરિકનને, તમારું કામ સોંપો તો એ બાબતની ચોખવટ કરી લેજો કે તેઓ જે ફી જણાવે છે એનાથી વધુ કંઈ આપવાનું રહેશે?

- ડો.સુધીર શાહ

'સુધીરભાઈ, તમારી ફી તો ખૂબ વધારે છે. અમેરિકાના ઇમિગ્રેશનના ના કાયદાના જાણકાર એટર્નીઓ પહેલું કન્સલ્ટેશન તો ફ્રીમાં આપે છે. પછી જે કામ કરવાનું હોય એની ફી પણ તમારી ફી કરતાં ખૂબ ઓછી હોય છે.’

મારા એક ક્લાયન્ટે આ મુજબની ફરિયાદ કરી. એમનું કામ મને ન સોંપતા કોઈ અમેરિકન એટર્ની પાસે એ કરાવ્યું.

એકાદ વર્ષ પછી તેઓ મને પાછા મળવા આવ્યા અને મને જણાવ્યું કે, ‘સુધીરભાઈ અમે તમને અમારું કામ ન સોંપ્યું એ ખૂબ જ મોટી ભૂલ કરી. એ અમેરિકન એટર્નીએ સૌપ્રથમ અમારી જે પિટિશન દાખલ કરવાની હતી એની તમે જે ફી જણાવી હતી એના કરતાં ખૂબ જ ઓછી ફી જણાવી. અમને લલચાવ્યા. ફીનો આટલો મોટો તફાવત જોઈને અમે તમને અમારું કામ ન સોંપતા એ અમેરિકન એટર્નીને અમારી પિટિશન દાખલ કરવાનું કામ સોંપ્યું. સૌપ્રથમ તો એમણે બધી જ ફી એક સામટી એડવાન્સમાં લઈ લીધી. પછી અમારું કામ પૂરું કરવા માટે અમને એમની ઑફિસના પાંચ-છ ધક્કા ખવડાવ્યા. ત્યાર બાદ માંડ માંડ બે ત્રણ મહિના પછી એમણે અમારું કામ હાથમાં લીધું. એ પછી એમણે એમના સ્ટેનોગ્રાફરને અમારી પિટિશન ટાઇપ કરવા માટે, એ સ્ટેનોગ્રાફરના ચાર્જીસ આપવાનું જણાવ્યું. જે ડોક્યુમેન્ટો એક્ઝિબિટ તરીકે પિટિશન જોડે જોડવાના હતા એ બધા એની ઝેરોક્ષ કોપી કરવા માટે જે ચાર્જ થતો હોય એનાથી બમણો ચાર્જ અમારી પાસે માગ્યો. પિટિશન કુરિયર દ્વારા મોકલવા માટેની ફી પણ લીધી.