പ്രാചിയുടെ പ്രിയങ്ങൾ

‘സിനിമയും സ്പോർട്സുമാണ് ജീവിതത്തെ മുന്നോട്ടു കൊണ്ടുപോവുന്നത്. തോൽവികളും നിരാശകളും മറികടക്കാൻ ഇവയെനിക്ക് കരുത്തായി... പ്രാചി ടെഹ്ലാൻ

- റീഷ്മ ദാമോദർ

രാജ്യത്തെ സ്പോർട്സ് മേഖലയിൽ വലിയൊരു പേരാണ്, പ്രാചി ടെഹ്ലാൻ. ദേശീയ-അന്തർദേശീയ തലത്തിൽ ഒരുപാട് നേട്ടങ്ങൾ കൈവരിച്ച ബാസ്കറ്റ് ബോൾ നെറ്റ്ബോൾ താരം, കോമൺ വെൽത്ത് ഗെയിംസിൽ രാജ്യത്തെ പ്രതിനിധീകരിച്ച പ്രായം കുറഞ്ഞ ക്യാപ്റ്റൻ... വിശേഷണങ്ങൾ ഏറെയാണ്. എന്നാൽ, മലയാളികൾക്ക് പ്രാചിയെ കൂടുതൽ പരിചയം മമ്മൂട്ടി ചിത്രമായ മാമാങ്കത്തിലൂടെയാണ്. മാമാങ്കത്തിലെ ഉണ്ണിമായയുടെ ഉയരമാണ് എല്ലാവരുടെയും ശ്രദ്ധയാകർഷിച്ചത്.

? സ്പോർട്സ് താരത്തിൽനിന്ന് അഭിനേത്രിയാവുന്നതെങ്ങനെയാണ്? 2015-ലാണ് സീരിയലിലേക്ക് ഓഫർ വരുന്നത്. ആ സമയത്ത് ഡൽഹിയിലെ ഒരു കമ്പനിയിൽ കൺസൾട്ടന്റായി ജോലി ചെയ്യുകയായിരുന്നു. അപ്പോഴാണ് ഫേസ്ബുക്ക് ഫാൻ പേജിലൂടെ ഒരു പ്രൊഡക്ഷൻ കമ്പനിയിൽ നിന്ന് മെസേജ് വരുന്നത്. ദിയ ഓർ ബാതേ ഹം എന്ന സ്റ്റാർ പ്ലസിലെ ഷോയിലേക്കായിരുന്നു എന്നെ വിളിച്ചത്. അടുത്തദിവസം തന്നെ ഓഡിഷനായി മുംബൈയിലെത്താൻ പറഞ്ഞു. ഓഡിഷനിൽ വിജയിക്കുകയും ചെയ്തു. പുതിയ സ്ഥലം, പുതിയ മേഖല.. പരീക്ഷിക്കുന്നതിൽ കുഴപ്പമില്ലെന്ന് തോന്നി. അങ്ങനെയാണ് മുംബൈയിലേക്ക് ഷിഫ്റ്റ് ചെയ്യുന്നത്. പിന്നീട് സ്റ്റാർ പ്ലസിന്റെ തന്നെ മറ്റൊരു ഷോയിലും അഭിനയിച്ചു. അതിനിടയ്ക്കാണ് മമ്മൂക്കയുടെ നായികയായി മാമാ ങ്ക'ത്തിലേക്ക് ഓഫർ വരുന്നത്.

സിനിമയിൽ അവസരം കിട്ടുക എളുപ്പമായിരുന്നോ?

ഈ മേഖല വളരെ ചാലഞ്ചിങ്ങാണ്. എന്റെ ലുക്ക്, തടി, നീളം...ഇതെല്ലാം വെച്ച് അവസരങ്ങൾ കിട്ടുക എളുപ്പമായിരുന്നില്ല. നല്ല കാസ്റ്റിങ് ഡയറക്ടർമാരുടെ കോണ്ടാക്ട് കിട്ടുക, മികച്ച സംവിധായകരുടെയും നിർമാതാക്കളുടെയും പ്രൊജക്ടിൽ അവസരം ലഭിക്കുക...എല്ലാം ബുദ്ധിമുട്ടായിരുന്നു. അങ്ങനെ കടന്നുവന്നതു കൊണ്ടാവാം ഈ മേഖല എന്നെ ബുദ്ധിമതിയാക്കി, പക്വതയുള്ളവളാക്കി...എങ്ങനെ ഓർഗനൈസ്ഡ് ആവാമെന്നും പഠിപ്പിച്ചു.