ഇന്നച്ചനിലെ പാട്ടുകാരൻ

പ്രേക്ഷകരുടെ മനസ്സിൽ ചിരിപടർത്തുകയും അവർ ഏറ്റുപാടുകയും ചെയ്ത ഇന്നസെന്റ് പാട്ടുകൾ ഏറെയാണ്...

- റീഷ്മ ദാമോദർ

സിനിമയിലെ ഒരുപാട് പാട്ടുകൾ തന്റേതായ രീതിയിൽ അഭിനയിച്ച് രസിപ്പിച്ചിട്ടുണ്ട് ഇന്നസെന്റ്. അതുമാത്രമല്ല കുറച്ച് സിനിമകളിൽ പാടിയിട്ടുമുണ്ട്. വെറുതേ പാടി പ്പോവുകയല്ല. പാട്ടുകളിലും ഒരു ഇന്നച്ചൻ ടച്ചുണ്ട്. അദ്ദേഹത്തിന്റെ ശൈലികളും ആ പാട്ടുകളിൽ കാണാം.

'ഗജകേസരിയോഗം' (1990) എന്ന സിനിമയിലാണ് ആദ്യമായി പാട്ടുപാടുന്നത്. ഹിന്ദി മാത്രമറിയുന്ന ആനയോട് സംസാരിക്കാനായി ഹിന്ദി പഠിക്കുന്ന ഉടമയുടെ കഥയാണ് 'ഗജകേസരിയോഗം.

ആനയെ മലയാളം പഠിപ്പിക്കാനുള്ള അയ്യപ്പൻ നായരുടെ ശ്രമങ്ങളും ആനയോടുള്ള സ്നേഹവുമൊക്കെ ഒരു പാട്ടായി ഈ സിനിമയിലുണ്ട്.

ആനച്ചന്തം
ഗണപതി മേളച്ചന്തം
എട്ടും പൊട്ടും തിരിയാനിത്തിരി ഹിന്ദിച്ചന്തം
ഇത്തിരി ഹിന്ദിച്ചന്തം
ആവോ ദാ ദാ അങ്ങനെ ദെന്താത്?
ആവോ ആവോനാ (സംഗീതം: ജോൺസൺ രചന: കൈതപ്രം)

ഈ പാട്ട് മറ്റൊരു ഗായകനെ വെച്ച് പാടിക്കാനായിരുന്നു ആദ്യം തീരുമാനിച്ചത്. പക്ഷേ, ഇന്നസെന്റ് ആ സിനിമയിലുടനീളം അയ്യപ്പൻ നായരായി തിളങ്ങിയപ്പോൾ, അദ്ദേഹത്തിന്റെ ശബ്ദത്തിൽ തന്നെ ആ പാട്ട് പാടിക്കാൻ കലൂർ ഡെന്നിസും പി.ജി. വിശ്വംഭരനും തീരുമാനിക്കുകയായിരുന്നു. ആ പാട്ടിനിടയ്ക്ക് ചില സംഭാഷണങ്ങളും ഉൾപ്പെടുത്തിയിട്ടുണ്ട്.

ആ പാട്ടിനു പിന്നിലൊരു കഥയു ണ്ട്. സംഗീതസംവിധായകനും സുഹൃത്തുമായ ജോൺസൺ നിർബന്ധിച്ചപ്പോഴാണ് ഇന്നസെന്റ് പാടാൻ തയ്യാറായത്. ചെന്നൈയിൽ എ.വി.എം സ്റ്റുഡിയോയിലായിരുന്നു റെക്കോഡിങ്. ജോൺസൺ ഇന്ന സെന്റിന് പാട്ട് പഠിപ്പിച്ചു കൊടുത്തു. ആദ്യ ടേക്കിൽ തന്നെ പാട്ട് ഓകെ. ഇന്നസെന്റിന് അത് അതിശയമായി. വലിയ ഗായകർ പോലും നാലും അഞ്ചും ടേക്കുകൾ പാടിയിട്ടാണ് ഓകെയാവുന്നത്. അഭിമാനത്തോടെ ഇന്നസെന്റ് പുറത്തേക്ക് നടന്നു. ഭാര്യയോടും സന്തോഷം പങ്കുവെച്ചു. തിരിച്ച് ഹോട്ടലിലെത്തിയ ഉടനെ ജോൺസണെ വിളിച്ചു.

“ജോൺസണാ, എന്റെ അതിശയം ഇപ്പോഴും മാറിയിട്ടില്ല. ഏതൊക്കെ ഗായകർ ഇങ്ങനെ ആദ്യ ടേക്കിൽ ഓകെയായിട്ടുണ്ട്”? കുറച്ചുനേരം ജോൺസൺ നിശ്ശബ്ദനായി. പിന്നീട് പറഞ്ഞു, “ആദ്യം പാടിയ ക്വാളിറ്റിയേ താൻ നൂറുവട്ടം പാടിയാലും ഉണ്ടാവൂ. കൂടുതൽ ടേക്ക് എടുക്കാൻ നിന്നാൽ നിർമാതാവിന് പണം നഷ്ടം എന്നല്ലാതെ വേറെ കാര്യമൊന്നുമില്ല. അതാ ഞാനാദ്യമേ ഓകെ പറഞ്ഞത്.