ചിരിയുടെ ജാലവിദ്യക്കാരൻ

“അനുസ്മരണ ചടങ്ങിൽ ഇന്നസെന്റേട്ടനെക്കുറിച്ച് പറഞ്ഞു തുടങ്ങുമ്പോഴേക്കും ആളുകളിൽ ഒരു ചിരി നിറയും വിചിത്രമായ ഒരനുഭവമായിരുന്നു അത്. മരണശേഷവും ഓർമകളിലൂടെയും കഥകളിലൂടെയും സ്വന്തം പേരിലൂടെയും ആളുകളെ ചിരിപ്പിക്കാൻ കഴിയുക എന്നത് ഇന്നസെന്റേട്ടന് മാത്രം സാധ്യമാകുന്ന ഒന്നാണ് മുകേഷ്

- മുകേഷ്

എവിടെയോ ഒരു പൂർവബന്ധം ഞങ്ങൾക്കിടയിൽ  കെട്ടുപിണഞ്ഞു കിടന്നിരുന്നു. ഇന്നസെന്റ് എന്ന വ്യക്തിയെ ആദ്യമായി കണ്ടനാൾ കൃത്യമായി ഓർമ്മയില്ല. എന്നാൽ, ഒരായുഷ്കാലം മുഴുവൻ ഓർത്തിരിക്കാൻ ഓർമ്മകളുടെ ഒരു ചിരിക്കാലം സമ്മാനിച്ചാണ് അദ്ദേഹം കടന്നുപോയത്. ഒരുപക്ഷേ, ഒരേവഴിയിലൂടെ സഞ്ചരിച്ച സഹയാത്രികരായിരുന്നു ഞങ്ങൾ. നാൽപ്പതുവർഷത്തോളം പഴക്കമുള്ള ആത്മബന്ധം. ഒരിക്കലും നിറംമങ്ങാത്ത ഇന്നസെന്റ് കഥക ളിലെ സ്ഥിരം കഥാപാത്രങ്ങളിൽ ഒരാളായിരുന്നു ഞാൻ. ഇന്നസെന്റേട്ടനുമായി ഏറ്റവും കൂടുതൽ സിനിമകളിൽ ഒന്നിച്ചഭിനയിച്ചത് ഒരുപക്ഷേ ഞാനാകാം.

കഥപറഞ്ഞ് സൗഹൃദം

കുറേ വർഷങ്ങൾക്കുമുമ്പ് ഒരു സിനിമയുടെ ഡബ്ബിങ്ങിനു വേണ്ടി തിരുവനന്തപുരത്തെ കീർത്തി ഹോട്ടലിൽ വെച്ച് കണ്ടിരുന്നു. അന്ന് നിർമാതാവിന്റെ റോളിലായിരുന്നു അദ്ദേഹം. കാളിദാസ കലാകേന്ദ്രത്തിന്റെ നാടകങ്ങളെക്കുറിച്ച് ഏറെനേരം സംസാരിച്ചു. എന്റെ അച്ഛൻ ഒ. മാധവന്റെ വലിയ ആരാധകനായിരുന്നു അദ്ദേഹം. അച്ഛന്റെ നാടകങ്ങളും സീനുകളു മൊക്കെ ചേട്ടന് മനഃപാഠമായിരു ന്നു. 'സംഗമം' എന്ന നാടകത്തിലെ എന്റെ അച്ഛന്റെ അഭിനയത്തെക്കുറിച്ചും സംഭാഷണങ്ങളെക്കുറിച്ചും നാടകത്തിൽ കമ്പമുണ്ടായിരുന്ന ഇന്നസെന്റ് എന്ന നിർമാതാവ് പറയുമ്പോൾ എന്റെയുള്ളിൽ അഭിമാനം നിറഞ്ഞു.

ഇന്നസെന്റ് സ്പീക്കിങ്...

സിദ്ദിഖ്-ലാലിന്റെ റാംജി റാവു സ്പീക്കിങ്ങി'ലെ മത്തായിച്ചേട്ടനിലേക്ക് അദ്ദേഹം എത്തിയത് അവിചാരിതമായിട്ടായിരുന്നു. അതിന് ഞാനൊരു നിമിത്തമായി മാറിയത് മറ്റൊരു സന്തോഷം. ഇന്നസെന്റേട്ടനെ മനസ്സിൽക്കണ്ടാണ് മത്തായി ച്ചേട്ടന്റെ സംഭാഷണങ്ങൾ തയ്യാറാക്കിയിരുന്നത്. എന്നാൽ, അതേ സമയത്ത് ജോഷി സംവിധാനം ചെയ്യുന്ന ചിത്രത്തിൽ അഭിനയിക്കാൻ അദ്ദേഹം ചെന്നൈയിലായിരുന്നു. ഡേറ്റ് ക്ലാഷ് ഒരു പ്രശ്നമായതിനാൽ ഒടുവിൽ മറ്റൊരു നടനെ ആ കഥാപാത്രമായി കാസ്റ്റ് ചെയ്യാൻ തീരുമാനിച്ചു.