സങ്കടക്കടൽ നീന്തിക്കടന്നവൻ

കലാഭവൻ മണിയെ ദേശീയപുരസ്കാര നിറവിലേക്കുയർത്തിയ സംവിധായകൻ വിനയൻ

- വിനയൻ

അഭിനയവും പാട്ടും നൃത്തവും മിമിക്രിയും എല്ലാം കൈമുതലായുള്ള ഒരു സർവ്വകലാവല്ലഭൻ. വളരെ പാവപ്പെട്ട കുടുംബത്തിൽ ജനിച്ച് വളരെയേറെ കഷ്ടപ്പാടുകൾ അനുഭവിച്ചു വളർന്ന് ജീവിതത്തോട് പൊരുതി വലിയവനായ കലാകാരൻ. താൻ വലിയവനായപ്പോഴും വന്ന വഴി മറക്കാതെ ചാലക്കുടിയിലെ പഴയ പാവപ്പെട്ട സുഹൃത്തുക്കളുടെ കൂടെ സമയം ചെലവഴിക്കാനും അവരെ സഹായിക്കാനും മനസ്സു കാണിച്ചവൻ. മണിക്ക് ഇനിയും ഏറെ ദൂരം നടക്കാനുണ്ടായിരുന്നു. പക്ഷേ മരണത്തിന്റെ ട്രാപ്പിൽ അവൻ കുടുങ്ങിപ്പോയി.

ചാലക്കുടിയിൽ മണിയുടെ വീടിനരികിൽ അദ്ദേഹം അന്ത്യവിശ്രമം കൊള്ളുന്ന ശവകുടീരം കാണാൻ ഇടയ്ക്കു പോയിരുന്നു. മണി അവിടെ നിന്നുകൊണ്ട് എന്തൊക്കെയോ സങ്കടങ്ങൾ എന്നോടു പറയുന്നപോലെ എനിക്കു തോന്നി. ചാലക്കുടിപ്പുഴയുടെ തോഴൻ ഒരു സങ്കടപ്പുഴ മുഴുവൻ തന്റെ ചെറുപ്പ കാലത്ത് നീന്തിക്കടന്ന കഥ ഒത്തിരി എന്നോടു പറഞ്ഞിട്ടുള്ളതാണ്. ജീവിതയാത്രയ്ക്കിടയിൽ കുറേ ഏറെ ദൂരം ഒരുമിച്ച് സഞ്ചരിച്ചവരാണല്ലോ മണിയും ഞാനും.