SRILANKAN DIARIES

എം.ടി.യുടെ ആന്തോളജി സിനിമയിൽ രഞ്ജിത്ത് സംവിധാനം ചെയ്യുന്ന 'കഡുഗണ്ണാവ ഒരു യാത്രക്കുറിപ്പിൽ അഭിനയിക്കാനാണ് മമ്മൂട്ടി ശ്രീലങ്കയിലെത്തിയത്. മമ്മൂട്ടിക്കൊപ്പം ശ്രീലങ്കയിൽ ചില ദിവസങ്ങൾ...

- കെ. ആർ. പ്രമോദ്

ശ്രീലങ്ക; മാപ്പിൽ ഇന്ത്യയുടെ കണ്ണുനീർത്തുള്ളിപോലെ നിൽക്കുന്ന കൊച്ചു രാജ്യം. തമിഴ്നാടിനോടു ഏറെ ബന്ധമുള്ള പ്രദേശം. കേരളത്തിൽ നിന്ന് വിമാനത്തിൽ ഒരു മണിക്കൂറിന് താഴെ മാത്രം ദൂരമുളള സ്ഥലം. കടലിനും ക്രിക്കറ്റിനും സിലോൺ ചായയ്ക്കും ഏറെ പേരുകേട്ട ദേശം. എന്നാൽ, കഴിഞ്ഞ കുറേ കാലമായി നമ്മുടെ അയൽരാജ്യത്തിൽ നിന്ന് വരുന്ന വാർത്തകൾ അത്ര ശുഭകരമായിരുന്നില്ല. സാമ്പത്തിക പ്രതിസന്ധി ദ്വീപ് രാജ്യത്തെ വരിഞ്ഞുമുറുക്കി. മണിക്കൂറോളം പവർകട്ട്, പെട്രോൾ ക്ഷാമം, ഭക്ഷണ പാനീയങ്ങൾക്കും ക്ഷാമം, പ്രസിഡന്റിന്റെയും പ്രധാനമന്ത്രിയുടെയും രാജി ആവശ്യപ്പെട്ടു കൊണ്ടുള്ള ജനകീയ പ്രക്ഷോഭം... ഇതൊക്കെയായിരുന്നു ലങ്കയിൽ നിന്ന് പുറംലോകം കേട്ട വാർത്തകൾ. ഈ വാർത്തകൾ പരക്കുന്ന സമയത്താണ് നിർമാതാക്കളായ സുധീർ അമ്പലപ്പാട്ടിന്റെയും അശ്വതിയുടെയും വിളി. എം.ടി.യുടെ ആന്തോളജി സിനിമയെപ്പറ്റി പറഞ്ഞു. അതിലെ ഒമ്പതാമത്തെ സിനിമയായ 'കഡു ഗണ്ണാവ ഒരു യാത്രക്കുറിപ്പിൽ മമ്മൂക്കയാണ് നടനെന്നും രഞ്ജിയേട്ടനാണ് (രഞ്ജിത്ത്) സംവിധാനം ചെയ്യുന്നതെന്നും അവർ പറഞ്ഞു. ഷൂട്ടിങ് ലങ്കയിലാണ്. അവിടേക്ക് കൂടെ വരണമെന്നും ആവശ്യപ്പെട്ടു.

ഞാൻ രണ്ടാമതൊന്നും ആലോചിച്ചില്ല. ഓക്കെ പറഞ്ഞു. മമ്മൂക്കയ്ക്കും രഞ്ജിയേട്ടനുമൊപ്പമുള്ള യാത്ര എങ്ങനെ മിസ്സ് ചെയ്യും. മുമ്പൊരിക്കൽ ഞങ്ങൾ ഒരുമിച്ച് വിദേശയാത്ര നടത്തിയിട്ടുണ്ട്. ജർമനിയിലേക്ക്. അന്ന് കടൽ കടന്ന് ഒരു മാത്തുക്കുട്ടി'യുടെ ഷൂട്ടായിരുന്നു. ആ മനോഹര ദിവസങ്ങൾ ഓർമയിലുളളതുകൊണ്ട്, “ഓക്കെ എന്ന് പറയാൻ അധികം സമയം വേണ്ടിവന്നില്ല.

ചിത്രീകരണത്തിന് മുമ്പ് രഞ്ജിയേട്ടനും സുധീറും അവിടത്തെ സാഹചര്യങ്ങൾ വിലയിരുത്തി. ലങ്കയിലെ ടൂറിസം ഡിപ്പാർട്ട്മെന്റുമായി സംസാരിച്ചു. പ്രശ്നങ്ങളില്ലെന്നും ഉറപ്പുവരുത്തി. ആവശ്യമായ പെർമിഷനുകളും വാങ്ങി. എന്നാലും ഉള്ളിൽ എവിടെയോ ടെൻഷൻ. മമ്മൂക്കയെ പോലെയുള്ള സൂപ്പർ താരത്തിന് യാത്ര ചെയ്യാൻ പറ്റിയ അവസ്ഥയിലാണോ ശ്രീലങ്ക ഇപ്പോൾ എന്ന ആധി വല്ലാതെ അലട്ടി. എനിക്ക് പറ്റുന്ന വഴിയിലൂടെ ഞാനും അന്വേഷിച്ചു. പുറത്തേക്ക് കേൾക്കുന്ന തരത്തിൽ പ്രശ്നങ്ങളൊന്നുമില്ലെന്ന് അവരും പറഞ്ഞു. പുറപ്പെടുന്നതിന് മൂന്ന് ദിവസം മുമ്പ് മാത്രമാണ് യാത്രയുടെ അറിയിപ്പ് കിട്ടുന്നത്. ശ്രീലങ്കയിൽ നിന്ന് ചില പേപ്പറുകൾ തയ്യാറാകാനുളള ബുദ്ധിമുട്ടായിരുന്നു വൈകാൻ കാരണം.