കാലം മാറിവരും കാറ്റിൻ ഗതിമാറും...

പാട്ടവതരണ വേദികളിൽ നിരന്തരം കടന്നുകൂടുന്ന പിഴവുകളെ ചൂണ്ടി കാണിക്കുകയാണിവിടെ.

- രവി മേനോൻ

പന്തയം വെച്ചാണ് വിളി, അതും നട്ടപ്പാതിരയ്ക്ക്. നൃത്തശാലയിലെ പൊൻവെയിൽ മണിക്കച്ചയഴിഞ്ഞുവീണു' എന്ന ഗാനം ആരെഴുതിയെന്നറിയണം വിളിച്ചുണർത്തിയ മാധ്യമസുഹൃത്തിന്.

“ഭാസ്കരൻ മാഷിന്റെ വരികളാണെന്ന് എത്ര പറഞ്ഞിട്ടും ഈ ചങ്ങാതി വിശ്വസിക്കുന്നില്ല. വയലാറെന്ന് വാശിപിടിച്ചു കൊണ്ടിരിക്കുകയാ...', പാതിരാവിളിക്കാരന്റെ പരിഭവം. “ചേട്ടൻ പറഞ്ഞാലേ ഇവൻ അംഗീകരിക്കൂ...

ഭാസ്കരനും വയലാറുമല്ല, ശ്രീകുമാരൻ തമ്പി എഴുതിയതാണ് ആ പാട്ടെന്ന് തിരുത്തുമ്പോൾ ഇരുവരുടെയും മുഖത്തു പടർന്നിരിക്കാവുന്ന അമ്പരപ്പ് ഊഹിക്കാനാകുമായിരുന്നു എനിക്ക്. പ്രതീക്ഷിച്ചപോലെ മറുപടി ഉൾക്കൊള്ളാൻ മടിച്ചു സുഹൃത്ത്: “ഏയ് ചേട്ടാ, ഒന്നുകൂടി ആലോചിച്ചു നോക്കിയേ... അതിലെ വരികളിൽ നിറയെ ഭാസ്കരൻ മാഷിന്റെ ടച്ചല്ലേ?” കുഴഞ്ഞ ശബ്ദത്തിൽ പാട്ടിന്റെ ചരണം മൂളുന്നു അയാൾ: “കാഞ്ചനനൂപുരങ്ങൾ അഴിച്ചുവെച്ചു, കാളിന്ദി പൂനിലാവിൽ മയക്കമായി, കണ്ണന്റെ മാറിലെ മലർമാലയാകുവാൻ കാമിനീ ഇനിയും നീ ഒരുങ്ങിയില്ലേ...

സംഭാഷണം കഴിഞ്ഞ് ഫോൺ വെയ്ക്കുമ്പോഴും പൂർണതൃപ്തനായിരുന്നില്ല സുഹൃത്ത്. കാലാകാലങ്ങളായി മനസ്സിൽ കൊണ്ടു നടന്ന വിശ്വാസമല്ലേ ഒറ്റനിമിഷംകൊണ്ട് തകർന്നു തരിപ്പണമായത്. വിശദീകരണത്തിൽ തൃപ്തനാകാതെ സാക്ഷാൽ ശ്രീകുമാരൻ തമ്പിയെത്തന്നെ നേരിട്ട് വിളിച്ചുണർത്തി സത്യം ചോദിച്ചറിഞ്ഞിട്ടേ അയാൾ ഉറങ്ങാൻ പോയുള്ളൂവെന്ന് പിന്നീടറിഞ്ഞു. അങ്ങനെ എത്രയെത്ര വിചിത്രാനുഭവങ്ങൾ.

ഇതേ പാട്ടിനെക്കുറിച്ച് ശ്രീകുമാരൻ തമ്പി പങ്കു വെച്ച മറ്റൊരനുഭവം ഓർമയിലുണ്ട്. നൃത്തശാല പുറത്തിറങ്ങി ഏറെക്കഴിയും മുൻപ് കുങ്കുമം വാരികയിൽ ഒരു നിരൂപണം അച്ചടിച്ചുവരുന്നു. അറിയപ്പെടുന്ന നോവലിസ്റ്റാണ് നിരൂപകൻ. “പടത്തെ പ്രശംസിച്ചാണ് അദ്ദേഹം എഴുതിയിരുന്നത് എന്നാണോർമ. എങ്കിലും ആ ലേഖനത്തിലെ ഒരു പരാമർശം മറക്കാനാവില്ല എനിക്ക്. ഏതാണ്ടിങ്ങനെയായിരുന്നു അത്. പടം കണ്ടശേഷവും മനസ്സിൽ തങ്ങിനിൽക്കുന്ന ഒരു മനോഹരഗാനമുണ്ട്. "പൊൻവെയിൽ മണിക്കച്ചയഴിഞ്ഞു വീണു...' നൃത്തശാലയിൽ രണ്ടു ഗാനരചയിതാക്കളുണ്ടെങ്കിലും ഈ ഗാനം പി. ഭാസ്കരനേ എഴുതാൻ കഴിയൂ.