ഒപ്പം നടന്നൊരാൾ

സിനിമയും സീമയുമായിരുന്നു ഐ.വി. ശശിയുടെ ജീവിതത്തിന്റെ വെളിച്ചം...ഒപ്പം നടന്ന ആ കാലത്തെ ഓർത്തെടുക്കുകയാണവർ

- സീമ / ഭാനുപ്രകാശ്

വർഷങ്ങൾ എത്ര പെട്ടെന്നാണ് കൊഴിഞ്ഞുപോകുന്നത്. എല്ലാം ഇന്നലെ സംഭവിച്ച പോലെ. ജീവിതത്തിലെ നാൽപത് വർഷങ്ങളിൽ ഒരു നിഴൽപോലെ അദ്ദേഹം എനിക്കൊപ്പമുണ്ടായിരുന്നു. ഒരുനിമിഷം പോലും വേർപിരിയാതെ, ആ മനസ്സ് എന്റെ കൂടെത്തന്നെയായിരുന്നു. ഇപ്പോൾ അഞ്ച് വർഷം കഴിഞ്ഞു, ശശിയേട്ടൻ വിട്ടുപോയിട്ട്. ഇനി മറ്റൊരു ജന്മത്തിൽ കണ്ടുമുട്ടിയെന്നു വരാം; അങ്ങനെയൊരു സമാഗമം ഉണ്ടായില്ലെന്നും വരാം. പക്ഷേ, ഈ ജന്മത്തിലെ അനുഭവങ്ങളും ഓർമ്മകളും മതി ഇനിയുള്ള ജീവിതത്തിന് കരുത്തുപകരാൻ. എന്നെക്കൊണ്ട് അഭിനയിപ്പിച്ച എല്ലാ വേഷങ്ങളെക്കാളും ഉയരത്തിലായിരുന്നു ശശിയേട്ടന്റെ ജീവിതത്തിൽ എനിക്കു ലഭിച്ച സ്ഥാനം. മുപ്പത്തിയേഴുവർഷത്തെ ഞങ്ങളുടെ ജീവിതം മുഴുവൻ തീവ്രമായ പ്രണയമായിരുന്നു.

സഹനത്തിന്റെയും അതിജീവനത്തിന്റെയും അടിയൊഴുക്കുകൾ ഒരുപാടുണ്ടായിരുന്നു. പരിഭവങ്ങളും പൊട്ടിച്ചിരികളും പിണക്കങ്ങളും ഉണ്ടായിരുന്നു. എന്നിട്ടും ഞങ്ങൾ പ്രണയിച്ചു കൊണ്ടേയിരുന്നു. റീടേക്കുകളില്ലാത്ത ജീവിതത്തിന്റെ ഓരോ സീനിലും ഞങ്ങൾ സ്നേഹിച്ചു കൊണ്ടേയിരുന്നു. അവസാനം വരെ സീമയും സിനിമയുമായിരുന്നു ശശിയേട്ടനെ പൊതിഞ്ഞുനിന്നത് എന്നു പറയുമ്പോൾ അതിലൊട്ടും അദ്ഭുതപ്പെടേണ്ട. എവിടെപ്പോയാലും എല്ലാ വിവരങ്ങളും ഫോണിലൂടെ അറിയിച്ചു കൊണ്ടേയിരിക്കും. ഭക്ഷണവും മരുന്നുമൊക്കെ കൃത്യ സമയത്തുതന്നെ കഴിക്കാൻ ഞാൻ ഓർമ്മിപ്പിച്ചിരുന്നു. അതെല്ലാം ഒരു - കുട്ടിയെപ്പോലെ അനുസരിക്കുകയായിരുന്നു അദ്ദേഹം. പക്ഷേ, ചികിത്സയ്ക്കപ്പുറം ജീവിതത്തിന്റെ ചില തീരുമാനങ്ങളുണ്ടല്ലോ, അതിനെ മറികടക്കാൻ ആർക്കും കഴിയില്ല. ഞാനും മക്കളും ആ വേർപാടുമായി ഇനിയും പൊരുത്തപ്പെടാനാവാതെ ചെന്നൈയിലെ വീട്ടിൽ കഴിയുന്നു

സിനിമയാണ് ശശിയേട്ടന്റെ കാമുകിയും ആദ്യഭാര്യയും. എന്നു മുതലാണ് ഞങ്ങൾ പ്രണയിച്ചു തുടങ്ങിയതെന്ന് കൃത്യമായി പറയാൻ ഞങ്ങൾക്ക് കഴിഞ്ഞിരുന്നില്ല. ഒരു പക്ഷേ. ഇതാ ഇവിടെ വരെ'യുടെ സെറ്റിൽ ഡാൻസ് ഗ്രൂപ്പിലെ ഒരംഗമായി ഞാൻ കടന്നുവന്നപ്പോൾ : ശശിയേട്ടന്റെ മനസ്സിൽ എന്റെ മുഖം ആഴത്തിൽ പതിഞ്ഞിരിക്കാം. പിന്നീട് ഈ മനോഹര തീരം' എന്ന സിനിമയിൽ ഒരു കാബറെ നർത്തകിയായി ഞാൻ വീണ്ടും ശശിയേട്ടന്റെ മുൻപിൽ പ്രത്യക്ഷപ്പെട്ടു. അപ്പോഴൊക്കെ അദ്ദേഹം എന്നെ അറിയാതെ ഇഷ്ടപ്പെട്ടിരിക്കാമെന്ന് പലവട്ടം പറഞ്ഞിരുന്നു.