કુછ પા કર ખોના હૈ.. કુછ ખો કર પાના હૈ..

બાલ્યાવસ્થામાં જેની આંખોનાં તેજ ખોવાયાં એ જૂનાગઢી ફૈયાઝને મળ્યો અમર ગાયક મુકેશનો અવાજ.

મુકેશ’મય ફૈયાઝ મુન્શી: યે મેરા દીવાનાપન હૈ...

પાર્શ્વગાયક મુકેશજીના ૧૦૦મા જન્મદિવસે મુકેશને આત્મસાત્ કરી દેનારો જૂનાગઢનો એક પ્રજ્ઞાચક્ષુ મુસ્લિમ યુવાન ફૈયાઝ ચિત્રલેખા સમક્ષ પોતાની એક અદમ્ય ઈચ્છા પ્રગટ કરે છેઃ ‘અયોધ્યામાં રામમંદિરનાં દ્વાર ખૂલે ત્યારે ભગવાન શ્રી રામની મૂર્તિ પાસે મારે મુકેશજીના સ્વરમાં રામાયણની ચોપાઈ ગાવી છે..’ 

હા, ફૈયાઝ મુન્શી મુકેશના અવાજમાં રામાયણની ચોપાઈ કડકડાટ ગાઈ શકે છે. કુરાનને પ્રેમ કરતા પ્રજ્ઞાચક્ષુ ફૈયાઝનો મુકેશ માટેનો પ્રેમ એટલો પ્રબળ છે, કહો કે એમણે પોતાનું જીવન જ મુકેશને સમર્પિત કરી દીધું. મુકેશનાં આશરે એકાદ હજાર ગીત એમને કંઠસ્થ છે. મુકેશના અવાજમાં ફૈયાઝને ગાતાં સાંભળીએ તો જાણે મુકેશ એમના શરીરમાં પ્રવેશીને ગાતા હોય એવું લાગે. ઘરની ડોરબેલમાં, મોબાઈલ ફોનના રિંગટોનમાં મુકેશ રણકે, બન્ને ફોન નંબર પણ મુકેશની જન્મતારીખ-મૃત્યુતારીખ સાથે મૅચ થાય અને એમના મ્યુઝિક રૂમની દીવાલો મુકેશના ફોટાથી ભરેલી છે. રૂમમાં છે મુકેશનાં ગીતોની રેકૉર્ડ્સ, ઑડિયો કૅસેટ્સનું કલેક્શન..