ചരിത്രത്തിലേക്ക് ഒരു കിക്ക്

ആത്മപ്രകാശനത്തിന്റെ കളിയായിരുന്നു ബ്രസീലുകാർക്ക് ഫുട്ബോൾ അതിന്റെ വേര് ചെന്നുകിടക്കുന്നത് ആ കളിയോടുള്ള ദരിദ്രന്റെയും കറുത്തവർഗക്കാരന്റെയും തീരാത്ത അഭിനിവേശങ്ങളിലാണ്

- കെ. വിശ്വനാഥ്

ദീർഘമായ ചരിത്രമല്ല ബ്രസീലിയൻ ഫുട്ബോളിന്റെത്. 19-ാം നൂറ്റാണ്ടിന്റെ അവസാനമാണ് ബ്രസീലിൽ ഫുട്ബോൾ അവതരിപ്പിക്കപ്പെട്ടത്. ഇന്ത്യയിൽ അതിനു മുൻപേ തന്നെ ഒരു ജനകീയ കായിക വിനോദമായി ഫുട്ബോൾ വളർന്നുകഴിഞ്ഞിരുന്നുവെന്നോർക്കണം.

സ്കോട്ലൻഡുകാരനായ പിതാവിന് ബ്രിട്ടീഷുകാരിയായ അമ്മയിൽ പിറന്ന ചാൾസ് വില്യം മില്ലറാണ് ബ്രസീലിയൻ ഫുട്ബോളിന്റെ പിതാവ്. 19-ാം നൂറ്റാണ്ടിന്റെ രണ്ടാംപകുതിയിൽ സാവോപോളോയിൽ റെയിൽവേനിർമാണത്തിനെത്തിയ കമ്പനിയിൽ എൻജിനീയറായിരുന്നു ചാൾസിന്റെ അച്ഛൻ ജോൺ മില്ലർ. 1874-ലാണ് ചാൾസ് ജനിച്ചത്. ചാൾസിനെ ഒൻപതാംവയസ്സിൽ തന്നെ വിദ്യാഭ്യാസത്തിനായി ഇംഗ്ലണ്ടിലേക്ക് അയച്ചു. സാന്റോസിൽ നിന്ന് കപ്പലിലാണ് ചാൾസ് ബ്രിട്ടനിലെ സതാംപ്ടൺ നഗരത്തിലെത്തിയത്. അവിടത്തെ ബന്നിസ്റ്റർ കോർട്ട് സ്കൂളിൽ ചാൾസ് പഠനമാരംഭിച്ചു. ബ്രിട്ടനിലെ സ്‌കൂളുകളിൽ ഫുട്ബോൾ അന്ന് ഏറെ പ്രചാരം നേടിക്കഴിഞ്ഞിരുന്നു. സ്വാഭാവികമായും ചാൾസും സ്കൂളിൽ വെച്ച് ഫുട്ബോളിന്റെ ബാലപാഠങ്ങൾ അഭ്യസിച്ചു. പഠനത്തെക്കാൾ കളിയോട് താത്പര്യം കാണിച്ച ചാൾസ് വൈകാതെ തന്നെ മിടുക്കനായ ഒരു കൊച്ചു ഫുട്ബോളറായി മാറി. അങ്ങനെ സതാം പ്ടൺ ക്ലബ്ബിലെത്തി. പിന്നീട് ഹാംഷയർ കൗണ്ടി ടീമിലും കളിക്കാൻ തുടങ്ങി. ഇംഗ്ലണ്ടിലെ യൂണിവേഴ്സിറ്റികളിലെയും പബ്ലിക് സ്കൂളിലെയും കുട്ടികളെ ഉൾപ്പെടുത്തി ആരംഭിച്ച കൊറിന്ത്യൻ ഫുട്ബോൾ ടീമിൽ 18-ാംവയസ്സിൽ ചാൾസ് ഇടംപിടിച്ചു.

അന്ന് ഇംഗ്ലണ്ടിൽ ഫുട്ബോളിന് ഇന്നത്തെപ്പോലെ നിയതമായ നിയമങ്ങളോ ചട്ടങ്ങളോ ഉണ്ടായിരുന്നില്ല. വ്യത്യസ്ത പ്രദേശങ്ങളിൽ വ്യത്യസ്ത നിയമങ്ങളുണ്ടായിരുന്നു. കൈകൊണ്ട് പന്ത് പിടിച്ച് എറിയുന്നതിനും ചില കൗണ്ടികളിൽ അനുവദിച്ചിരുന്നു. പക്ഷേ, കൊറിന്ത്യൻ ടീമംഗങ്ങൾ തികഞ്ഞ സ്പോർട്സ്മാൻ സ്പിരിറ്റോടെ ഒളിമ്പിക്സ് തത്ത്വങ്ങൾ ഉയർത്തിപ്പിടിച്ച് ഫുട്ബോളിനെ ശുദ്ധീകരിക്കാൻ ശ്രമിച്ചിരുന്നു. എതിർടീമിലെ ഒരു സ്ട്രൈക്കറെ ഫൗൾ ചെയ്ത് പെനാൽട്ടി വഴങ്ങേണ്ടിവരുന്ന സന്ദർഭങ്ങളിൽ കൊറിന്ത്യൻ ക്ലബ് ടീമിന്റെ ഗോളി പെനാൽട്ടി കിക്ക് തടുക്കാനേ ശ്രമിച്ചിരുന്നില്ല.

ബ്രസീലിലെ ആദ്യ ക്ലബ്ബ്