മെസ്സി റിപ്പബ്ലിക്ക്

1986 ലോകകപ്പ് വിജയമാണ് കേരളത്തിൽ അർജന്റീനയ്ക്ക് ആരാധകരെ സൃഷ്ടിച്ചത്. അന്ന് മാറഡോണയെ ആരാധിച്ചവരുടെ ഹൃദയത്തിലാണ് ഇന്ന് ലയണൽ മെസ്സിയുടെ സ്ഥാനം (6 R

- അൻസീഫ് അബു

അർജന്റീന ലോകകപ്പ് നേടണം എന്നാഗ്രഹിച്ചതിലും എത്രയോ അധികം മനുഷ്യർ ഇക്കുറി ലയണൽ മെസ്സി കപ്പുയർത്തുന്നത് സ്വപ്നം കണ്ടിരിക്കും. കടുത്ത അർജന്റീനവൈരികൾ പോലും ലോകഫുട്ബോളിന്റെ ചരിത്രത്തിലെ എക്കാലത്തെയും വലിയ ആ സ്വപ്നനിമിഷത്തിന് സാക്ഷിയാവണമെന്ന് ഒരുവേളയെങ്കിലും ആഗ്രഹിച്ചി ട്ടുണ്ടാവും. ലോകഫുട്ബോളിന്റെ ആരാധനാചരിത്രത്തിലെ സവിശേഷമായ സന്ദർഭങ്ങളിലൊന്നിന്റെ പേരാണ് മെസ്സി എന്ന് ഒരിക്കൽക്കൂടി സ്ഥാനപ്പെടുത്തുക കൂടിയായിരുന്നു യഥാർത്ഥത്തിൽ ഈ ലോകകപ്പ് കാലം. അതേസമയം മാറഡോണയ്ക്കും കാർലോസ് ടെവസിനുമൊന്നും ലഭിച്ച ജനപ്രിയത അർജന്റീനയിൽ മെസ്സിക്കുണ്ടായില്ല എന്ന വസ്തുത ഇതിനോടകം നിരവധി ഫുട്ബോൾ പഠിതാക്കൾ ചൂണ്ടിക്കാണിച്ചിട്ടുമുണ്ട്. മെസ്സി ആരാധകരുടെ റിപ്പബ്ലിക്കിൽ അർജന്റീനയ്ക്ക പുറത്തുള്ളവരായിരിക്കും കൂടുതൽ. മലയാളികളുടെ മെസ്സി ആരാധനയുടെ ചരിത്രവും അതിനാൽ ഗൗരവമേറിയ അന്വേഷണങ്ങൾക്ക് സാധ്യതയുള്ള ഒന്നാണ്. മെസ്സിയുടെ പാദങ്ങളുടെ ലാഘവവും കൃത്യതയും എന്റെ വിരലുകൾക്ക് എപ്പോഴാണ് ഉണ്ടാവുക എന്നെഴുതിയത് കവി കല്പറ്റ നാരായണനാണ്. എന്നെങ്കിലുമൊരിക്കൽ മെസ്സിയോട് സംസാരിക്കാനാവും എന്ന പ്രതീക്ഷയിൽ സ്പാനിഷ് ഭാഷ പഠിച്ച ജുഷ ഷാഹിനും മെസ്സി ഗോളടിക്കാനായി മമ്പുറം പള്ളിയിൽ പ്രാർഥനകൾ നടത്തിക്കൊണ്ടിരിക്കുന്ന മുഹമ്മദ് ബഷീറുമെല്ലാം പ്രതിനിധീകരിക്കുന്നത് വലിയ ജനസംഖ്യയുള്ള ആ റിപബ്ലിക്കിനെയാണ്.

കേരളത്തിന്റെ മെസ്സി ആരാധന പൊതുവിൽ വികസിച്ചത് രണ്ട് വഴികളിലൂടെയാണ്. അർജന്റീനയോടും മാറഡോണയോടുമുള്ള ആരാധനയുടെ തുടർച്ച എന്ന നിലയിൽ വികസിച്ചുവന്നതാണ് അതിൽ ആദ്യത്തേത്. അർജന്റീന പിൻതുടർന്ന ഫുട്ബോൾ ശൈലിയെക്കൂടി പരിഗണിച്ചാലേ അത് കൂടുതൽ വ്യക്തമാകൂ. ബ്രീട്ടിഷുകാർ കൊണ്ടുവന്ന "യഥാർത്ഥ' ഫുട്ബോൾ, കൂട്ടായ്മയുടെ കരുത്തിനെയും കളിയുടെ രീതിശാസ്ത്രത്തെയും ആശ്രയിച്ചപ്പോൾ അർജന്റീനയിൽ വികസിച്ച ക്രിയോ ശൈലിയുടെ അടിസ്ഥാനം കളിക്കാരുടെ വ്യക്തിഗത കൗശലവും ഗംബീത്തയുടെ ക്രിയാത്മകതയുമായിരുന്നു എന്ന് രാജീവ് രാമചന്ദ്രൻ ചെളി പുരളാത്ത പന്ത്' എന്ന പുസ്തകത്തിലെഴുതുന്നുണ്ട്. മറഡോണയെപ്പോലെയും മെസിയെപ്പോലെയുമുള്ള ഒറ്റയാൾ വിസ്മയങ്ങളായിരുന്നു എക്കാലവും അർജന്റീനയുടെ കരുത്ത്. മരിയോ കെംപസും മാറഡോണയും മെസ്സിയും ഉൾപ്പെടുന്ന പ്രതിഭാസാന്നിധ്യമില്ലാതെ ടീമെന്ന നിലയിൽ അർജന്റീന ഒരുകാലത്തും മികവ് പ്രകടിപ്പിച്ചിരുന്നില്ലെന്നത് ഈ ശൈലിയുടെ സവിശേഷതയാണ്.