നിലവാരം ഉയർത്തും

ഇന്ത്യൻ ഫുട്ബോളിൽ വിപ്ലവകരമായ മാറ്റം കൊണ്ടുവരാനുള്ള ഒരുക്കത്തിലാണ് അഖിലേന്ത്യ ഫുട്ബോൾ ഫെഡറേഷന്റെ പുതിയ കമ്മിറ്റി. എ.ഐ.എഫ്.എഫ്. ജനറൽ സെക്രട്ടറി ഷാജി പ്രഭാകർ സംസാരിക്കുന്നു

- അനീഷ് പി. നായർ

രാജ്യത്തെ ഫുട്ബോൾ വികസനത്തിന് പുത്തൻ ആശയങ്ങളുമായി മുന്നോട്ടുപോകുകയാണ് അഖിലേന്ത്യ ഫുട്ബോൾ ഫെഡറേഷൻ. വിഷൻ 2047 പോലെയുള്ള പദ്ധതികൾ അവർ പ്രഖ്യാപിച്ചു.

ഫുട്ബോളിലെ വിപ്ലവകരമായ മാറ്റങ്ങൾക്ക് ചുക്കാൻ പിടിക്കുന്നതിൽ പ്രധാനിയാണ് ഫെഡറേഷൻ ജനറൽ സെക്രട്ടറിയായ ഷാജി പ്രഭാകരൻ. ഈ സ്ഥാനത്ത് എത്തുന്ന ആദ്യ മലയാളി കൂടിയായ ഷാജി പ്രഭാകരൻ ഇന്ത്യൻ ഫുട്ബോളിൽ വരുന്ന മാറ്റങ്ങളും പ്രതീക്ഷകളും പങ്കുവെക്കുന്നു.

ചർച്ചയായി സന്തോഷ് ട്രോഫി

സന്തോഷ് ട്രോഫിക്ക് ജീവൻ നൽകാനുള്ള ശ്രമത്തിന്റെ ഭാഗമായിട്ടാണ് ഇത്തവണ മാറ്റം വരുത്തിയത്. ഘടന മാറിയതോടെ കളിക്കാർക്ക് കൂടുതൽ മത്സരം ലഭിച്ചു. മുമ്പ് അഞ്ച് മത്സരങ്ങളാണ് ഒരു താരത്തിന് ലഭിച്ചിരുന്നത്. ഇത്തവണ മത്സരങ്ങളുടെ എണ്ണം കൂടി,

ഫൈനൽ റൗണ്ട് മത്സരങ്ങളുടെ നിലവാരം കൂടി. സമീപകാലങ്ങളിൽ സന്തോഷ് ട്രോഫി ഇന്ത്യൻ ഫുട്ബോളിൽ ചർച്ച ആയിരുന്നില്ല. ടൂർണമെനിന് തീരെ ശ്രദ്ധകിട്ടിയിരുന്നില്ല. സന്തോഷ് ട്രോഫിയെ മറ്റ് ലീഗുകളിലേക്കുള്ള സപ്ലെ ലൈൻ ആക്കി മാറ്റുകയാണ് ലക്ഷ്യം. 

ഇത്തവണ വന്ന മാറ്റം കൊണ്ട് ടീമുകൾ സീരിയസ് ആയി ടൂർണമെന്റിനെ കാണാൻ തുടങ്ങി. വിദേശത്ത് സെമിയും ഫൈനലും നടത്തിയത് കളിക്കാർക്ക് പ്രചോദനമായി. സന്തോഷ് ട്രോഫിയുടെ മൂല്യം ഉയർന്നു.

സന്തോഷ് ട്രോഫി വിദേശത്ത് നടത്തിയത് പരീക്ഷണം ആണ്. നിലവിൽ നടത്തുന്നതിന്റെ എത്രയോ മടങ്ങ് ചിലവാണ് ഉണ്ടായത്. കളിക്കാരിൽ നിന്നും കാണികളിൽ നിന്നുമുള്ള പ്രതികരണം നോക്കിയാകും തുടർന്നുളള കാര്യങ്ങൾ. സമ്മാനത്തുക കൂട്ടുന്നതടക്കമുളള കാര്യങ്ങൾ പരിഗണിക്കും. നിലവിൽ തന്നെ ബജറ്റ് ഉയർന്നു.