കലർപ്പില്ലാത്ത പതിനൊന്ന്

ചരിത്രത്തിലെ മികച്ച ഫ്രഞ്ച് ' ഇലവനെ തെരഞ്ഞെടുക്കുന്നതിന് - ഒറ്റ ഉദ്ദേശ്യമേ ഉള്ളൂ. ഈ ലിസ്റ്റ് കാണുമ്പോൾ വായനക്കാർക്ക് അതിനോട് തോന്നുന്ന യോജിപ്പും വിയോജിപ്പും തുടർചർച്ചകളും ആലോചനകളുമായി മാറും. ആ ആലോചനകളിൽ ഫ്രഞ്ച് ഫുട്ബോളിന്റെ വലിയൊരു ചരിത്രം മനസ്സിൽ അനാവരണം ചെയ്യപ്പെടും

- കെ.എം.നരേന്ദ്രൻ

പത്തൊമ്പതാം നൂറ്റാണ്ടിന്റെ ഏതാണ്ട് പകുതിയോടെ ഫ്രാൻസിൽ ഫുട്ബോൾ എത്തി. മറ്റെല്ലാ രാജ്യങ്ങൾക്കുമെന്ന പോലെ ഫ്രാൻസിനും ഫുട്ബോൾ കിട്ടിയത് ഇഗ്ലണ്ടിൽനിന്നു തന്നെ. 1863 തൊട്ടെങ്കിലും ഫ്രാൻസിൽ ഫുട്ബോൾ കളി നടന്നതായി വിശ്വസനീയമായ രേഖകൾ ഉണ്ട്. സത്യത്തിൽ ഫുട്ബോൾ എന്ന കളിയുടെ വശ്യതയുടെ ഏറ്റവും വലിയ തെളിവ് ഫ്രഞ്ചുകാർ ഫുട്ബോൾ സ്വീകരിച്ചു എന്നതാണ്. കാരണം ഇംഗ്ലണ്ടുമായി നൂറ്റാണ്ടുകളുടെ സൗന്ദര്യപ്പിണക്കത്തിലായിരുന്നു ഫ്രാൻസ്. പരസ്പരം കളിയാക്കലും കുത്തുവാക്കും മാത്രമല്ല യുദ്ധം വരെ ഇരുരാജ്യങ്ങളും തമ്മിൽ ഉണ്ടായിട്ടുണ്ട്. ഇഗ്ലണ്ടിൽ നിന്ന് പുറപ്പെട്ട ഒന്നും ഫ്രാൻസ് സ്വീകരിച്ചിട്ടില്ല. ലോകം മുഴുവൻ സ്വീകരിച്ച ഇംഗ്ലിഷ് ഭാഷ പോലും ഫ്രഞ്ചുകാർക്ക് വേണ്ട. പക്ഷേ, ഇംഗ്ലിഷ് ഭാഷ തോറ്റിടത്ത് ഫുട്ബോൾ ജയിച്ചു. ഫ്രഞ്ചുകാർ ആവേശത്തോടെ ഫുട്ബോളിനെ സ്വീകരിച്ചു. ഇംഗ്ലിഷുകാരേക്കാൾ മികവും അവർ നേടി. ഇന്ന് പതിനെട്ടര ലക്ഷം രജിസ്റ്റേഡ് കളിക്കാരും പതിനെണ്ണായിരത്തിലധികം ഫുട്ബോൾ ക്ലബ്ബുകളും ഫ്രാൻസിലുണ്ട്. രണ്ട് തവണ (1998, 2018) അവർ ലോകചാമ്പ്യന്മാരായി. എന്ന് മാത്രമല്ല, ലോകഫുട്ബോൾ ചരിത്രത്തിലെ ഏറ്റവും പ്രഗത്ഭരായ നിരവധി കളിക്കാരേയും അവർ സംഭാവന ചെയ്തു. ഇതൊക്കെ പറഞ്ഞാലും മലയാളികളായ ഫുട്ബോൾ പ്രേമികൾക്ക് ഫ്രാൻസിന്റെ ഫുട്ബോൾ കരുത്ത് ബോദ്ധ്യം വരില്ല. അവരുടെ മനസ്സ് ലാറ്റിനമേരിക്കൻ ടീമുകൾക്ക് ഒപ്പമാണ്. അതിനാൽ ഫ്രഞ്ച് ഫുട്ബോളിന്റെ ഗരിമ അവരുടെ മനസ്സിലെത്തിക്കാൻ ഒരു കാര്യം കൂടി പറയാം. ഫുട്ബോൾ ലോകത്തിന്റെ അവസാനവാക്കായി മലയാളികൾ കരുതുന്ന ബ്രസീലിനെ ലോകകപ്പ് ഫുട്ബോളിൽ പല തവണ മുട്ടുകുത്തിച്ച യൂറോപ്യൻ ടീം ഫ്രാൻസ് ആയിരുന്നു.