എലിസ്റ്റ മെമ്മറീസ്

എലിസ്റ്റയിൽ വിശ്വനാഥൻ ആനന്ദ് ഇന്ത്യക്കായി കളിച്ചില്ല. പക്ഷേ അത് അദ്ദേഹത്തിന്റെ റാങ്കിങ്ങിനെ ബാധിച്ചില്ല. 1992-ന് ശേഷം രണ്ട്-മൂന്ന് സ്ഥാനങ്ങളിൽ ആനന്ദ് എപ്പോഴുമുണ്ടായിരുന്നു. ചെസ് ഒളിമ്പ്യാഡ് ഓർമകൾ അവസാനിക്കുന്നു

- ഹരിഹരനന്ദനൻ

മനിലയിലെ പ്രകടനം ഇന്ത്യയുടെ ചെസ് സ്വപ്നങ്ങൾക്ക് വലിയ പോറലേല്പിച്ചു. ഒളിമ്പ്യാഡിൽ പത്തിൽ നിന്ന് ഇരുപതിലേക്കും അതിനും താഴേക്കും ഇന്ത്യ പോയപ്പോൾ ആനന്ദ് മുകളിലേക്ക് കയറിക്കൊണ്ടിരുന്നു; ഏതാണ്ട് സുനിൽ ഗാവസ്കറുടെയും സച്ചിൻ തെണ്ടുൽക്കറുടെയും കാലത്തെ ഇന്ത്യൻ ക്രിക്കറ്റ് ടീമിനെപ്പോലെ. ഒരു വ്യത്യാസം മാത്രം: ഗാവസ്കറിനും സച്ചിനും ഇന്ത്യക്കുവേണ്ടി കളിക്കാതെ തരമില്ല; എന്നാൽ ആനന്ദിന് ഇന്ത്യക്കുവേണ്ടി കളിക്കാതെ തന്നെ ലോക ചാമ്പ്യൻഷിപ്പിൽ മുകളിലേക്ക് പോകാമായിരുന്നു. 1992-നുശേഷം രണ്ടുവർഷത്തിനിടയിൽ ആനന്ദ് ലോകറാങ്കിങ്ങിൽ രണ്ട് മൂന്ന് സ്ഥാനങ്ങളിൽ സ്ഥിരപ്രതിഷ്ഠ നേടി.

മോസ്കോ (1994), യെറെവൻ (1996) ഒളിമ്പ്യാഡുകളിൽ ആനന്ദില്ലാതെ ഇന്ത്യ ഉഴറുകയായിരുന്നു. 1998 ആയപ്പോഴേക്കും സ്ഥിതി മാറി. ആനന്ദിന്റെ നാട്ടുകാരനായ കൃഷ്ണൻ ശശികിരൺ മുൻനിരയിൽ വന്നതോടെ വീണ്ടും പ്രതീക്ഷയായി. എന്നാൽ 1998-ൽ എലിസ്റ്റയിൽ അരങ്ങേറുന്ന ഒളിമ്പ്യാഡിൽ ആനന്ദ് ഇന്ത്യക്കു വേണ്ടി കളിക്കുമെന്ന ശ്രുതി പരന്നു.

ഏതാണ്ട് അതേ സമയത്തുതന്നെയായിരുന്നു ഇന്ത്യൻ എക്സ്പ്രസ് രണ്ടായി വിഭജിക്കപ്പെട്ടതും. ബോംബെ ഗ്രൂപ്പ് "ദി ഇന്ത്യൻ എക്സ്പ്രസ് ആയി, മധുര-ചെന്നൈ ഗ്രൂപ്പ് ന്യൂ ഇന്ത്യൻ എക്സ്പ്രസും'. ഞങ്ങൾക്ക് അതൊരു പുതിയ അനുഭവമായിരുന്നു. ചെന്നൈയിൽ ഗ്രൂപ്പ് എഡിറ്റർ നിയമിക്കപ്പെട്ടിരുന്നില്ല. അതുകൊണ്ടുതന്നെ ബോംബെ ഗ്രൂപ്പിന്റെ എഡിറ്റോറിയൽ സെന്ററായ ഡൽഹിയുടെ നിയന്ത്രണം പൂർണമായി മാറിയിരുന്നില്ല.

ഇതിനിടെ ആനന്ദ് ഫിലാർ ഞങ്ങളുടെ സ്പോർട്സ് എഡിറ്ററായി നിയമിതനായിരുന്നു. ബീലിലും (സ്വിറ്റ്സർലൻഡ്) ലാസ് പൽമാസിലും ന്യൂയോർക്കിലും ലോകചാമ്പ്യൻഷിപ് കവർ ചെയ്തുകഴിഞ്ഞതിനാൽ എലിസ്റ്റ (റഷ്യ) ഒളിമ്പ്യാഡ് റിപ്പോർട്ടിങ് എന്റെ ചുമതലയായിത്തീർന്നു. ആനന്ദ് കളിച്ചേക്കുമെന്ന വാർത്ത വന്നതോടെ ഒരു നോട്ട് തയ്യാറാക്കാൻ ഫിലാർ എന്നോട് പറഞ്ഞു. എനിക്ക് വളരെയധികം താത്പര്യമുള്ള സ്ഥലമായിരുന്നു റഷ്യ. ചെസ്സിൽ മനസ്സർപ്പിച്ച ആർക്കും അങ്ങനെയാകാനേ തരമുള്ളൂ.