Bye Bye MITHALI

റെക്കോഡുകളുടെ കളിത്തോഴിയായ മിതാലി രാജ് വിടവാങ്ങുന്നതോടെ വനിതാക്രിക്കറ്റിൽ ഒരുയുഗം അവസാനിക്കുകയാണ്

- അഭിനാഥ് തിരുവലത്ത്

 ഇന്ത്യൻ വനിതാ  ക്രിക്കറ്റ് ടീമിനെ ഉയരങ്ങളിലെത്തിച്ച മിതാലി രാജ് കളി മതിയാക്കി. വനിതാ ക്രിക്കറ്റിലെ നിരവധി റെക്കോഡുകൾ സ്വന്തം പേരിൽ കുറിച്ചാണ് മിതാലിയുടെ മടക്കം.

2017-ലെ വനിതാ ലോകകപ്പ് ആരംഭിക്കുന്നതിന് തൊട്ടുമുമ്പ് നടന്ന ഒരു വാർത്താ സമ്മേളനം. അന്ന് ഇന്ത്യൻ ക്യാപ്റ്റനായിരുന്ന മിതാലി രാജിനോട് ഇഷ്ടപ്പെട്ട പുരുഷ ക്രിക്കറ്റ് താരം ആരെന്ന് ഒരു മാധ്യമപ്രവർത്തകന്റെ ചോദ്യം. ഇംഗ്ലണ്ട് മണ്ണിൽ ലോക കപ്പിനൊരുങ്ങുന്ന വനിതാ ടീം ക്യാപ്റ്റന് ആ ചോദ്യം അത്രയ്ക്കങ്ങ് പിടിച്ചില്ല. പുരുഷ താരങ്ങളോട് ഇഷ്ടപ്പെട്ട വനിതാ ക്രിക്കറ്റ് താരം ആരെന്ന് നിങ്ങൾ ചോദിക്കാറുണ്ടോ എന്നായിരുന്നു അന്ന് മിതാലി നൽകിയ മുഖമടച്ചുള്ള മറുപടി. ക്രിക്കറ്റ് എന്നാൽ പുരു ഷൻമാരുടെ കളിയാണ് എന്ന ഇന്ത്യൻ പൊതുബോധത്തിനേറ്റ അടി കൂടിയായിരുന്നു ആ മറുപടി. പ്രൊഫഷണൽ ഭരതനാട്യം കലാകാരിയായിരുന്ന മിതാലി സ്ത്രീത്വം വിളങ്ങുന്ന ആ കല വിട്ട് മാസ്കുലിൻ ഗെയിമിലേക്കെത്തിയതിന്റെ മാറ്റവും അതിൽ കാണാമായിരുന്നു.

2017 ലോകകപ്പ് ഫൈനലിൽ ബാറ്റ് ചെയ്യാൻ കാത്തിരിക്കവേ റൂമിയെ വായിച്ച് ഡഗ്ഔട്ടിലിരിക്കുന്ന മിതാലിയുടെ ചിത്രം തന്നെയാണ് അവരെ മഹത്തരമാക്കുന്നത്. നാൽപതാം പിറന്നാൾ ആഘോഷിക്കാൻ മാസങ്ങൾ അവശേഷിക്കെ കാൽനൂറ്റാണ്ടു കാലത്തെ കരിയർ അവസാനിപ്പിച്ച് അവർ തിരശ്ശീലയ്ക്ക് പിന്നിൽ മറയുകയാണ്. ഭരതനാട്യത്തിൽ നിന്ന് കിട്ടിയ നിംബിൾ ഫൂട്ടുകളിൽ, അസാധാരണ പാദചലനങ്ങളോടെ മിതാലി നീണ്ട 23 വർഷങ്ങളാണ് ഇന്ത്യൻ വനിതാ ക്രിക്കറ്റിൽ ആടിത്തീർത്തത്. ഇനി വേദിയിലുണ്ടാകില്ല എന്ന പ്രഖ്യാപനം ഒരുപാട് ഹൃദയങ്ങളെ വേദനിപ്പിച്ചു. പക്ഷേ എല്ലാ യാത്രയും അവസാനിക്കുന്നതുപോലെ ഈ യാത്രയും അവസാനിപ്പിക്കാൻ നേരമായെന്ന മിതാലിയുടെ പ്രഖ്യാപനം അംഗീകരിച്ചേ മതിയാകൂ.

ചിലങ്ക ഉപേക്ഷിച്ച് ക്രിക്കറ്റിലേക്ക്