Muhammad Ali ഇടിക്കൂട്ടിലെ നർത്തകൻ

ബോക്സിങ് എന്ന കായികവിനോദത്തിന്റെ പര്യായപദങ്ങളിലൊന്നാണ് മുഹമ്മദ് അലി എന്ന പേര്. ഉദ്ദേശം കാൽനൂറ്റാണ്ടുകാലം റിങ്ങിൽ ഇടിമുഴക്കം സൃഷ്ടിച്ച ആ മഹാപ്രതിഭ തന്റെ മത, രാഷ്ട്രീയ വിശ്വാസങ്ങളിലെ കാർക്കശ്യം കൊണ്ടും പ്രതിബദ്ധത കൊണ്ടും വ്യത്യസ്തനായി നിലകൊണ്ടു

- ഷിജു സുകുമാരൻ

 1964 ഫെബ്രുവരി 25, ഫ്ളോറിഡയിലെ മയാമി ബീച്ചിലെ കൺവെൻഷൻ ഹാളിലൊരുക്കിയ ഇടിക്കൂട്ടിൽ ലോക ഹെവിവെയ്റ്റ് ബോക്സിങ് ചാമ്പ്യൻഷിപ്പ് നടക്കുന്നു. ഒരു വശത്ത് അജയ്യനെന്നും കരടിയെന്നുമൊക്കെ ആരാധകർ വിളിക്കുന്ന നിലവിലെ ചാമ്പ്യൻ സോണി ലിസ്റ്റൺ. മറുവശത്ത് അത്രയൊന്നും അറിയപ്പെടാത്ത, ‘അണ്ടർഡോഗ്' എന്ന മാധ്യമങ്ങളുടെ സാധാരണ വിശേഷണത്തിൽ പെട്ട ഇരുപത്തിരണ്ടുകാരൻ. കെന്റക്കിയിൽ നിന്നു വരുന്ന കറുത്തു മെലിഞ്ഞ ഈ ചെറുപ്പക്കാരനു വേണ്ടി ചിലരെങ്കിലും ബെറ്റ് വച്ചിരുന്നു.

കാരണം പതിനെട്ടാം വയസ്സിൽ, 1960-ലെ റോം ഒളിമ്പിക്സിൽ ലൈറ്റ് ഹെവിവെയ്റ്റിൽ സ്വർണം നേടിയ ചരിത്രം അവനുണ്ട് എന്നതുതന്നെ. എങ്കിലും സോണി ലിസ്റ്റണു മുന്നിൽ ആ ചെറുപ്പക്കാരൻ എന്താകുമെന്ന് മഹാഭൂരിപക്ഷം കാഴ്ചക്കാർക്കും വലിയ സംശയമുണ്ടായിരുന്നില്ല. പക്ഷേ ആരാധകരുടെ വിദൂര സ്വപ്നങ്ങളിൽ പോലുമില്ലാത്തതായിരുന്നു ക്ലൈമാക്സ്. ചോര കലർന്ന വിയർപ്പുമായി ലിസ്റ്റൺ റിങ്ങിൽ തളർന്നിരുന്നപ്പോൾ ബോക്സിങ്ങിന് പുതിയൊരു ലോകനായകൻ ഉദയം ചെയ്തു: മുഹമ്മദ് അലി എന്നു പിൽക്കാലത്ത് അറിയപ്പെട്ട കാഷ്യസ് മാർസെല്ലസ് ക്ലേ

മയാമിയിലേത് ഒരു തുടക്കം മാത്രമായിരുന്നു. കായിക ചരിത്രത്തിലെ ഏറ്റവും വലിയ അട്ടിമറികളിലൊന്ന് കേവല യാദൃച്ഛികതയല്ലെന്ന് കാലം തെളിയിച്ചു. സ്വയം "ദ ഗ്രേറ്റസ്റ്റ്' എന്നു വിശേഷിപ്പിച്ച കാഷ്യസ് ക്ലേയെ ലോകം മുഴുവൻ അങ്ങനെ വിളിക്കുന്ന കാലം വന്നു. അക്കാലത്ത് അമേരിക്കയിൽ നടമാടിയിരുന്ന വംശീയ വേർതിരിവിന്റെ എല്ലാ കയ്പ്പുനീരുകളും കുടിച്ചുവളർന്ന ക്ലേ, താൻ നേരിട്ട അപമാനങ്ങളെയൊക്കെ കരുത്താക്കി മാറ്റുകയായിരുന്നു. ലോക ഹെവിവെയ്റ്റ് ചാമ്പ്യനായതിന്റെ പിറ്റേ ദിവസം തന്റെ പേര് 'കാഷ്യസ് എക്സ് എന്നു മാറ്റിയ അദ്ദേഹം ഒരാഴ്ചയ്ക്കു ശേഷം മുഹമ്മദലി എന്ന പേരു സ്വീകരിക്കുകയും ഇസ്ലാം മതത്തിലേക്കു മാറിയതായി പ്രഖ്യാപിക്കുകയും ചെയ്തു.

വായാടിയുടെ പഞ്ച്