വോൺ നൂറ്റാണ്ടിന്റെ സ്പന്ദനം

മരണത്തിൽപോലും ദുരൂഹതയുടെ തെളിവുകൾ അവശേഷിപ്പിച്ചു വോൺ. വിവാദങ്ങളുടെ അകമ്പടി മാത്രമല്ല, പ്രതിഭയുടെ അപൂർവ സ്പർശം കൊണ്ടുകൂടിയാണ് വോൺ ക്രിക്കറ്റിലെ മാറഡോണയാകുന്നത്

- വിഷ്ണു രാമകൃഷ്ണൻ

ഷെയിൻ വോണിനെ ആദ്യമായി കണ്ടുമുട്ടിയപ്പോൾ അദ്ദേഹത്തിന്റെ കണ്ണുകളാണ് തന്നെ ഏറ്റവും ആകർഷിച്ചതെന്ന് പറയുന്നുണ്ട് ഓസ്ട്രേലിയൻ എഴുത്തുകാരനും ക്രിക്കറ്റ് നിരീക്ഷകനുമായ ആൻഡ്രൂ റാംസേ. തുടർന്ന് വോണിന് കൈകൊടുത്തപ്പോൾ താരത്തിന്റെ ശാരീരികശക്തി ശരിക്കും മനസ്സിലായെന്നും റാംസേ എഴുതുന്നു. തടിച്ച് വിരലുകളും ഉരുക്കുപോലെ ബലമുള്ള കൈത്തണ്ടയും തന്റെ ടൂൾ ആക്കിയ വോൺ, ബോളിങ് തികവുറ്റ ഒരു കലാസൃഷ്ടിയാക്കി മാറ്റി. മൈതാനങ്ങളിൽ ആരെയും അമ്പരപ്പിക്കുന്ന ജാലവിദ്യകൾ കാട്ടി ഒന്നര പതിറ്റാണ്ടോളം അയാൾ നിറഞ്ഞാടി. തന്റെ എല്ലാ ശക്തിയും വലം കൈയിലേക്ക് ആവാഹിക്കാൻ കാരണമായ ഒരു സംഭവം വോണിന്റെ കുട്ടിക്കാലത്തുണ്ടായി. കിന്റർഗാർട്ടനിലായിരുന്നപ്പോൾ മറ്റൊരു കുട്ടി ഉയരത്തിൽ നിന്ന് വോണിന്റെ പുറത്തേക്ക് ചാടുകയും വീഴ്ചയുടെ ആഘാതത്തിൽ രണ്ട് കാലുകൾക്ക് ഗുരുതരമായി പരിക്കേൽക്കുകയുമുണ്ടായി. തുടർന്ന് ഒരു വർഷത്തോളം കൈകൾ കൊണ്ട് നിയന്ത്രിക്കാനാകുന്ന ഒരു ട്രോളിയിലായി വോണിന്റെ ജീവിതം. പിൽക്കാലത്ത് തന്റെ കൈത്തണ്ടകൾക്ക് കൂടുതൽ ബലം ലഭിക്കാനും ലെഗ് സ്പിൻ നന്നായി ചെയ്യാനും സഹായിച്ചുവെന്ന് ഒരിക്കൽ അദ്ദേഹം പറഞ്ഞിട്ടുണ്ട്. പൂർവമാതൃകകളില്ലാത്ത ആ കരകൗശലവിദ്യ അനുകരണങ്ങൾക്കതീതമായി, അതുല്യമായി ഇന്നും ക്രിക്കറ്റ് പ്രേമികളുടെ ഓർമയിൽ കറങ്ങിത്തിരിയുന്നു.