കോച്ചിങ് ഞാൻ ആസ്വദിക്കുന്നു

തുടർച്ചയായ രണ്ടാം സീസണിലും കേരള ബ്ലാസ്റ്റേഴ്സ് ഐ.എസ്.എല്ലിന്റെ പ്ലേ ഓഫിൽ പ്രവേശിച്ചിരിക്കുന്നു. ഈ കുതിപ്പിന് ബ്ലാസ്റ്റേഴ്സ് കടപ്പെട്ടിരിക്കുന്നത് പരിശീലകനോടാണ്. ബ്ലാസ്റ്റേഴ്സ് പരിശീലകൻ ഇവാൻ വുകോമാനോവിച്ച് സംസാരിക്കുന്നു

- ശിഹാബുദ്ധീൻ തങ്ങൾ

എൺപതുകളുടെ മധ്യത്തിലെ പശ്ചിമ സെർബിയയിലെ ഊഷിറ്റ്സെ എന്ന നഗരം. സ്കൂൾ വിട്ടുവന്ന ഇവാൻ എന്ന ബാലൻ പുസ്തകസഞ്ചി വീടിന്റെ മൂലയിലിട്ട് മൈതാനത്തേക്കോടി. അവിടെ അവന്റെ കൂട്ടുകാർ കളി തുടങ്ങാൻ പന്തുമായി കാത്തു നിൽക്കുന്നു.

അന്ന് യുഗോസ്ലാവ്യയുടെ ഭാഗമായിരുന്ന സെർബിയയിൽ ആഭ്യന്തര കലാപങ്ങൾ കൊടുമ്പിരി കൊളളുന്ന കാലമായിരുന്നു അത്. സ്കൂൾ വിട്ടാൽ കുട്ടികൾക്ക് ആകെയുള്ള വിനോദോപാധി ഫുട്ബോൾ മാത്രമായിരുന്നു. രാഷ്ട്രീയ-സാമ്പത്തിക അസ്ഥിരതകൾ ജീവിതത്തിന്റെ നിറംകെടുത്തുമ്പോഴും തെരുവുകളിൽ ഇവാനും കൂട്ടുകാരും കാൽപന്തുകൊണ്ട് വർണപ്പൊലിമയൊരുക്കി. തങ്ങളുടെ ബാല്യത്തെ കാൽപന്താവേശവുമായി ചേർത്തുവെച്ചു.

പക്ഷേ, ബാല്യത്തിലെ ഒന്നു മറിയാതെയുള്ള ആ കളികൾക്ക് അധികം ആയുസ്സുണ്ടായിരുന്നില്ല. പ്രായമേറുന്തോറും, തങ്ങളുടെ വീടുകൾക്കുള്ളിൽ പിടിമുറുക്കുന്ന ദാരിദ്ര്യവും പട്ടിണിയും ഇവാനും കൂട്ടുകാരും തിരിച്ചറിഞ്ഞുതുടങ്ങി. പലരും കുടുംബത്തെ സഹായിക്കാനുള്ള വഴികൾ തേടാനാരംഭിച്ചു. കൗമാരത്തിലെത്തിയ ഇവാൻ അതിനുള്ള മാർഗമായി കണ്ടത് കാൽപന്തിനെ തന്നെയായിരുന്നു. ഇതിനകം തന്നെ ഡിഫൻഡറെന്ന നിലയിൽ ശ്രദ്ധ നേടിക്കഴിഞ്ഞ അവൻ കൂടുതൽ സമയം മൈതാനത്ത് ചെലവിട്ടു. കഠിനാധ്വാനം ചെയ്തു. സ്ലോബോഡ ഊഷിറ്റ്സെ എന്ന സ്വന്തം നഗരത്തിലെ ഫുട്ബോൾ ക്ലബ്ബിൽ അംഗമാകാൻ അവന് അധികകാലം വേണ്ടിവന്നില്ല. പതിനേഴാം വയസ്സിൽത്തന്നെ പ്രൊഫഷണൽ ഫുട്ബോൾ രംഗത്തെത്തിയ ഇവാൻ സെർബിയ അണ്ടർ-21 ദേശീയ ടീമിലേക്കും ഫ്രഞ്ച് ലീഗിലെ പ്രമുഖരായ എഫ്സി ബോർഡോയിലേക്കും വേഗത്തിൽ വളർന്നു.

എന്നെ കൂടുതൽ നന്നായി കളിക്കാൻ പ്രേരിപ്പിച്ചത് കുട്ടിക്കാലത്തെ ദാരിദ്ര്യമായിരുന്നു. കളിയിലൂടെ കുടുംബത്തിന് ഒരു വരുമാനമാർഗമുണ്ടാക്കണം എന്നതായിരുന്നു ലക്ഷ്യം. അതല്ലെങ്കിൽ അന്ന് അത് മാത്രമായിരുന്നു എന്റെ മുന്നിലുള്ള വഴി. വർഷങ്ങൾക്കിപ്പുറം കൊച്ചിയിലെ ഹോട്ടലിലിരുന്ന് അന്നത്തെ ആ ബാലൻ -കേരള ബ്ലാസ്റ്റേഴ്സ് കോച്ച് ഇവാൻ വുകോമനോവിച്ച് പറയുന്നു. ഫുട്ബോൾ അക്ഷരാർത്ഥത്തിൽ ജീവിതം തന്നെയാണ് വുകമനോവിച്ചിന്. ജീവിതം കരുപ്പിടിപ്പിക്കാനുള്ള പോരാട്ടവും. ആ പോരാട്ടവീര്യമാണ് ഏറ്റവും അത്യാവശ്യമായിരുന്ന ഘട്ടത്തിൽ ബ്ലാസ്റ്റേഴ്സിന് പുതുശ്വാസം നൽകിയതും.