കേരളാ എം.എൽ.എയ് കന്നട ഹെൻതി

കനകഹാമയും അന്നപൂർണേശ്വരി ദേവിയും പിന്നെ പി.സി. വിഷ്ണുനാഥ് എം.എൽ.എയും

- പി. ജയചന്ദ്രൻ,

കൊല്ലം പുത്തൂർ മാവടി പാലോട്ടുവീട്ടിൽ ചെല്ലപ്പൻ പിള്ളയുടേയും ലീലയുടേയും മകൻ വിഷ്ണുനാഥിന് എല്ലാം ഇപ്പോഴും ഒരു അതിശയമായിട്ടാണ് തോന്നുന്നത്. നിയമസഭയിലേക്ക് മത്സരിക്കാൻ സീറ്റ് കിട്ടിയത്, വിജയിച്ചത്. സഭയിൽ കന്നിപ്രസംഗം നടത്തിയത്. ഒന്നും അങ്ങോട്ട് വിശ്വസിക്കാൻ കഴിയുന്നില്ല. കാരണം വെണ്ടാർ വിദ്യാധിരാജാ സ്കൂളിലും ശാസ്താംകോട്ട ദേവസ്വം ബോർഡ് കോളേജിലുമൊക്കെ കെ.എസ്.യു കളിച്ചു നടക്കുമ്പോൾ, പിൽക്കാലത്ത് ഒരു മുഴുവൻ സമയ രാഷ്ട്രീയക്കാരനായി മാറുമെന്നോ രാഷ്ട്രീയമാണ് തന്റെ കർമ്മമേഖലയെന്നോ ഒന്നും വിഷ്ണുനാഥ് സ്വപ്നത്തിൽപ്പോലും കരുതിയിരുന്നില്ല. തിരുവനന്തപുരം ലോ കോളേജിൽ എൽ.എൽ.ബിക്ക് പഠിക്കുന്ന കാലത്ത് പാളയത്ത് ബസ്സിറങ്ങി കോളേജിലേക്ക് നടക്കുമ്പോൾ ഇടതുവശത്തു കാണുന്ന നിയമസഭാമന്ദിരത്തെ അത്ഭുതത്തോടും കൗതുകത്തോടും കൂടി നോക്കുമായിരുന്ന വിഷ്ണുനാഥ് ഒരിക്കൽപ്പോലും സന്ദർശകപാസ് എടുത്തിട്ടു പോലും അതിനകത്ത് കയറിയിട്ടില്ല.

പക്ഷേ കാലം ചിലതൊക്കെ കരുതിവച്ചിരുന്നു. പാലോട്ടു വീട്ടിൽ ചെല്ലപ്പൻപിള്ളയുടെ മകൻ പി.സി. വിഷ്ണുനാഥ്, കേരളാ നിയമ നിർമ്മാണ സഭയിൽ അംഗമാകണമെന്നുള്ളത്, തീർച്ചയായും കാലത്തിന്റെ നിയോഗമായിരുന്നിരിക്കാം. അതുകൊണ്ടാണല്ലോ 2006 ലെ നിയമസഭാ തെരഞ്ഞെടുപ്പിൽ ചെങ്ങന്നൂരിൽ നിന്ന് മത്സരിക്കാൻ കോൺഗ്രസ് പാർട്ടി ലോകോളേജ് വിദ്യാർത്ഥി വിഷ്ണു നാഥിനെ നിയോഗിച്ചത്. ഇന്നത്തെ സാംസ്കാരിക വകുപ്പുമന്ത്രി സജി ചെറിയാനായിരുന്നു എതിരാളി. കടുത്ത പോരാട്ടത്തിൽ സജി ചെറിയാനെ തോൽപ്പിച്ച്, തലേന്നു വരെ താൻ അത്ഭുതത്തോടെ നോക്കിയിരുന്ന നിയമസഭയിലേക്ക് കടന്നു ചെല്ലുമ്പോൾ ആ സഭയിലെ ഏറ്റവും പ്രായം കുറഞ്ഞ അംഗമായിരുന്നു വിഷ്ണുനാഥ്. വയസ്സ് 26. ഏറ്റവും പ്രായം കൂടിയ അംഗം മുഖ്യമന്ത്രിയായിരുന്ന വി.എസ്. അച്യുതാനന്ദനും. ഇന്നിപ്പോൾ വിഷ്ണുനാഥ് പ്രതിനിധീകരിക്കുന്ന കുണ്ടറയിൽ നിന്നുള്ള എം.എൽ.എ അന്ന് എം.എ. ബേബിയായിരുന്നു. ബേബിയല്ല ബേബി, ബേബി വിഷ്ണുനാഥാണ് എന്നുപറഞ്ഞുകൊണ്ടാണ് ഒരു പത്രം അന്ന് വിഷ്ണുനാഥിനെ വിശേഷിപ്പിച്ചത്.

സംഭവം അന്ന് കെ.എസ്.യുവിന്റെ പ്രസിഡന്റൊക്കെയായിരുന്നെങ്കിലും അച്യുതാനന്ദനേയും ഉമ്മൻചാണ്ടിയേയുമൊക്കെപ്പോലുള്ള പ്രഗത്ഭമതികളിരിക്കുന്ന സഭയിലേക്ക് ചെന്നപ്പോൾ ശരിക്കും പരിഭ്രമിച്ചുപോയി എന്നാണ് ഇപ്പോഴും വിഷ്ണുനാഥ് പറയുന്നത്. അതുപറയുമ്പോൾ അന്നത്തെ ആ പരിഭ്രമം ഇന്നും വിഷ്ണുനാഥിന്റെ മുഖത്ത് തെളിഞ്ഞുകാണാം.