വ്യത്യസ്തമീ തിരുവാതിരസദ്യ

എട്ടങ്ങാടി, തിരുവാതിര പുഴുക്ക്, കൂവ പായസം എന്നിവയാണ് വ്രതാചാരത്തിന്റെ ഭാഗമായി എത്തുന്ന വിഭവങ്ങൾ.

- നാരായണൻ പോറ്റി

ധനുമാസത്തിലെ തിരുവാതിര എന്നത് തിരുവാതിര വ്രതമാണ്. ആചാരത്തിലും അനുഷ്ഠാനങ്ങളിലും മറ്റ് വ്രതങ്ങളിൽ നിന്നും ഏറെ വ്യത്യസ്തത പുലർത്തുന്ന ഒന്നാണ് ധനുമാസ തിരുവാതിര വ്രതം. സാധാരണ വ്രതങ്ങൾ ഒരു നേരം ആഹാരം കഴിച്ചും, ചില വ്രതങ്ങൾ ആഹാരം ഇല്ലാതെ ഉപവാസമായിട്ടുമെല്ലാമാണ് ആചരിക്കപ്പെടുന്നത്. എന്നാൽ ധനുമാസത്തിലെ തിരുവാതിര എന്നതു്, ഏറ്റവും അധികം ആഹാരം കഴിക്കുന്ന വ്രതമാണ്.

അരി ആഹാരം കഴിക്കില്ല. എന്നാൽ അരിക്ക് പകരം ഗോതമ്പ് ചോറാണ് കഴിക്കുക. സാധാരണ സദ്യവട്ടത്തിന് ഉപയോഗിക്കുന്ന എല്ലാ വിഭവങ്ങളും ഗോതമ്പ് ചോറിൽ ചേർത്ത് കഴിക്കും. പപ്പടം ഉൾപ്പെടെ ചേർത്ത ഗംഭീരസദ്യ തന്നെയാണ് തിരുവാതിര നാളിലെ ഉച്ചഭക്ഷണം.